မိတ္ထီလာတွင် ကျန်းမာရေးထောက်ခံစာအတုကိုင်ဆောင်သည့် ယာဉ်မောင်းကို အရေးယူ
DVB
·
November 26, 2020
မန္တလေးတိုင်း၊ မိတ္ထီလာမြို့၊ မိတ္ထီလာ-ကျောက်ပန်းတောင်းလမ်း မြတ်နိုးသူတိုးဂိတ်မှာ နိုဝင်ဘာ ၂၅ ရက်က ကျိုင်းတုံဘက်ကိုသွားမယ့် လိုက်ထရပ်ကား ယာဉ်မောင်း တစ်ဦးကို စစ်ဆေးရာ ကျန်းမာရေးစစ်ဆေးချက်ထောက်ခံစာအတု ကိုင်ဆောင်ထားတဲ့အတွက် သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေနဲ့ ဖမ်းဆီးအရေးယူလိုက်တယ်လို့ မိတ္ထီလာမြို့မရဲစခန်းက သိရပါတယ်။
မိတ္ထီလာမြို့မရဲစခန်းတာဝန်ကျရဲအရာရှိ တစ်ဦးက "မြို့အဝင်မှာ ကျန်းမာရေးဌာနက ဝန်ထမ်းတွေ၊ ဌာနဆိုင်ရာတွေပါတဲ့ ပူးပေါင်းအဖွဲ့နဲ့ ကျန်းမာရေးစစ်ဆေးမှုလုပ်နေတာပါ။ လိုက်ထရပ်ယာဉ်မောင်းဆီမှာ ကိုဗစ်-၁၉ ဓာတ်ခွဲနမူနာစစ်ဆေးချက် ထောက်ခံစာအတုကို တွေ့လို့ လက်ထောက်ကျန်းမာရေးမှူးက တရားလိုလုပ်ပြီး အမှုဖွင့်လိုက်ပါတယ်" လို့ ပြောပါတယ်။
မကွေးမြို့နယ်၊ ကြာကန်ရွာနေ လိုက်ထရပ်ယာဉ်မောင်း ကိုသိန်းဝင်း(၂၈နှစ်)ကို မိတ္ထီလာမြို့မရဲစခန်းမှာ လက်ထောက်ကျန်းမာရေးမှူး ဦးအာကာဖြိုးက တရားလိုပြုလုပ်ပြီး အမြင့်ဆုံးပြစ်ဒဏ် ထောင် ၃နှစ်အထိ ချမှတ်နိုင်တဲ့ သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေ ပုဒ်မ၂၅/ပုဒ်မ ၃၀(က)တို့နဲ့ ဖမ်းဆီးအရေးယူ အမှုဖွင့်ထားပါတယ်။
သတင်း-မောင်မောင်လင်း၊ ဓာတ်ပုံ-မိတ္ထီလာယာဉ်ထိန်းတပ်ဖွဲ့
