ဝိုင်းမော်တွင် စည်ပင်၀န်ကြီးအပါအဝင် အန်အယ်လ်ဒီကိုယ်စားလှယ်လောင်းအားလုံး အနိုင်ရ
DVB
·
November 9, 2020
ကချင်ပြည်နယ်၊ ဝိုင်းမော်မြို့နယ်မှာ လက်ရှိ စည်ပင်၀န်ကြီးဦးနော်လီအပါအဝင် အန်အယ်လ်ဒီ ကိုယ်စားလှယ်လောင်းအားလုံး ထပ်မံအနိုင်ရရှိခဲ့တယ်လို့ အမျိုးသားဒီမိုကရေစီအဖွဲ့ချုပ် မြို့နယ်ပါတီတာ၀န်ရှိသူက ပြောပါတယ်။
အမျိုးသားလွှတ်တော်မှာ ဦးဇယ်ခါင်၊ ပြည်သူ့လွှတ်တော်မှာ ဦးလဂန်ဇယ်ဂျုံး ၊ ပြည်နယ်လွှတ်တော်မဲဆန္ဒနယ် ၁ မှာ ဦး၀င်းညွန့်နဲ့ လက်ရှိစည်ပင်၀န်ကြီး ဦးနော်လီက ပြည်နယ်လွှတ်တော်မဲဆန္ဒနယ် ၂ မှာ အသီးသီး အနိုင်ရရှိခဲ့တာဖြစ်ပါတယ်။
အန်အယ်လ်ဒီကိုယ်စားလှယ် ၄ ယောက်စလုံးအနိုင်ရတဲ့အကြောင်းကို ဝိုင်းမော်မြို့နယ် အမျိုးသားဒီမိုကရေစီအဖွဲ့ချုပ် သတင်းနှင့်ပြန်ကြားရေးအဖွဲ့ကလည်း ထုတ်ပြန်ကြေညာထားပါတယ်။
ဒီနေ့မနက် ၇ နာရီကျော်အထိ ဆန္ဒမဲတွေ ဆက်လက်ရေတွက်နေဆဲဖြစ်ပေမဲ့ ဦးနော်လီက ပြည်နယ်လွှတ်တော် အမှတ် ၂ မှာ မဲ အရေအတွက် ၅၀၀၀ ကျော်နဲ့ အပြတ်အသတ်အနိုင်ရရှိခဲ့တာ ဖြစ်ပါတယ်။
၂၀၂၀ ရွေးကောက်ပွဲမှာ ဝိုင်းမော်မြို့နယ်အတွင်း နိုင်ငံရေးပါတီ ၁၂ ပါတီမှ ကိုယ်စားလှယ်လောင်း ၄၁ ယောက်၀င်ရောက်ယှဉ်ပြိုင်ခဲ့တာဖြစ်ပါတယ်။
မဲရလဒ်တွေကို ပြည်ထောင်စုရွေးကောက်ပွဲကော်မရှင်က တရားဝင်ထုတ်ပြန်မှသာ အတည်ပြုနိုင်မှာ ဖြစ်ပါတယ်။
သတင်း- ဇုန်းကျန်း CJ
