ရွှေကျင်မြို့နယ်၊ ရဲသောင်ကျေးရွာအုပ်စုတွင် ရွေးကောက်ပွဲကျင်းပပေးရန် ဆန္ဒပြ
DVB
·
October 29, 2020
ပဲခူးတိုင်းဒေသကြီး၊ ရွှေကျင်မြို့နယ် ရဲသောင်ကျေးရွာမှာ ရွေးကောက်ပွဲကျင်းပပေးဖို့ ဒေသခံ ကရင်တိုင်းရင်းသားတွေက အောက်တိုဘာ ၂၉ ရက် ဒီနေ့မနက်က ရွှေကျင်မြို့ကို လာရောက်ပြီး စီးတန်းလှည့်လည်ဆန္ဒပြ တောင်းဆိုကြပါတယ်။
၂၀၂၀ ရွေးကောက်ပွဲအတွက် မဲစာရင်းနှစ်ကြိမ်လာကပ်ပြီးမှ လုံခြုံရေးအကြောင်းပြကာ ရွေးကောက်ပွဲမကျင်းပနိုင်ဘူးလို့ ပြည်ထောင်စုရွေးကောက်ပွဲကော်မရှင်က ကြေညာတာဟာ ပြည်သူ့အခွင့်အရေး၊ မဲပေးပိုင်ခွင့်အခွင့်အရေးတွေကို ပိတ်ပင်တားဆီးသလို ဖြစ်နေတယ်လို့ ဆန္ဒပြရာမှာပါဝင်တဲ့ ဦးအေးလွင်က ပြောပါတယ်။
ရဲသောင်ကျေးရွာအုပ်စုဟာ နယ်မြေလုံခြုံအေးချမ်းတဲ့အပြင် လွတ်လွတ်လပ်လပ်မဲပေးခွင့် ရတဲ့ကျေးရွာဖြစ်တာကြောင့် ကျေးရွာသူရွာသားတွေရဲ့ကိုယ်စား ဆန္ဒပြရတာလို့ ဆိုပါတယ်။
"ရဲသောင်ကျေးရွာအုပ်စုဟာ ပြည်ထဲရေးအမည်ပေါက်ကျေးရွာဖြစ်တယ်။ ကျေးရွာအုပ်ချုပ်ရေးမှူး၊ ထွေအုပ်စာရေးတွေလည်းခန့်ထားတယ်။ စာသင်ကျောင်းနဲ့ ကျေးလက်ဆေးပေးခန်းတွေရှိတဲ့ ကျေးရွာကြီးဖြစ်ပါတယ်။ ဒီလိုကျေးရွာကို ရွေးကောက်ပွဲ မကျင်းပနိုင်ဘူးလို့ ကြေညာတာဟာ လုံးဝမဖြစ်သင့်လို့ ဆန္ဒပြရတာဖြစ်တယ်" လို့ ဦးအေးလွင် က ပြောပါတယ်။
ရဲသောင်ကျေးရွာအုပ်စုမှာ ရွေးကောက်ပွဲကျင်းပပေးဖို့အတွက် ရွာသူ ရွာသား ၃၀ လောက်က ရွှေကျင်မြို့လွတ်လပ်ရေးကျောက်တိုင်မှ မြို့နယ်ရွေးကောက်ပွဲ ကော်မရှင်အဖွဲ့ခွဲရုံးအထိ ငြိမ်းချမ်းစွာလှည့်လည် ဆန္ဒပြတောင်းဆိုခဲ့ကြပါတယ်။
ဆန္ဒပြသူတွေက ရဲသောင်ကျေးရွာ အုပ်စုမှာ ရွေးကောက်ပွဲကျင်းပပေးရေး၊ ဒီမိုကရေစီလူ့အခွင့်ရေးရရှိရေး၊ မဲပေးခွင့်ပိတ်ပင်တားဆီးခြင်းအလိုမရှိ၊ ပြည်သူ့အခွင့်အရေး တန်းတူရရှိရေးချက်ခြင်း ဆောင်ရွက်ပေး၊ လုံခြုံရေးအကြောင်းပြအခွင့်ရေးပိတ်ခြင်းအလိုမရှိစတဲ့ အချက်ငါးချက်တောင်းဆိုခဲ့ကြပါတယ်။
ရွေးကောက်ပွဲကျင်းပနိုင်ခြင်းမရှိဘူးလို့ ပြည်ထောင်စုရွေးကောက်ပွဲကော်မရှင်က ကြေညာထားတဲ့ ရွှေကျင်မြို့နယ်ထဲက ကျေးရွာအုပ်စု ၃၀ မှာ ကျေးရွာအုပ်စု ၂၉ အုပ်စုဟာ ရွာပုန်းရွာရှောင်တွေဖြစ်ပြီး ရဲသောင်ကျေးရွာအုပ်စု တခုတည်းသာ ရွာအဖြစ် တည်ရှိတာ ဖြစ်ပါတယ်။
ရဲသောင်ကျေးရွာအုပ်စုမှာ ဝါးဖြူတောင်၊ ဇီးဖြူတောင်၊ ရဲသောင်၊ ကျွဲတဲ၊ ထီးဖဒို၊ မဲပျော့၊ ဟတ်ကြီးစတဲ့ ကျေးရွာ ၇ ရွာပါဝင်နေပြီ အိမ်ခြေ ၃၀၀ ကျော်ရှိကာ အသက် ၁၈ ပြည့်ပြီး ဆန္ဒမဲပေးပိုင်ခွင့်ရှိသူ ၉၀၀ ကျော်ရှိပါတယ်။
ရွှေကျင်မြို့နယ် ရဲသောင်ကျေးရွာအုပ်စုဟာ ၂၀၁၀ ရွေးကောက်ပွဲနဲ့ ၂၀၁၅ အထွေထွေရွေးကောက်ပွဲကို အောင်မြင်စွာကျင်းပခဲ့တဲ့ ကျေးရွာအုပ်စု ဖြစ်ပါတယ်။
နေလင်းထိုက်
