မွန်ပြည်နယ်တွင် ကိုဗစ်-၁၉ လူနာသစ် ၅ ဦး ထပ်တွေ့၊ အတည်ပြုလူနာ ၅၀၀ ကျော် ရှိလာ
DVB
·
October 19, 2020
မွန်ပြည်နယ်မှာ ကိုဗစ်-၁၉ အတည်ပြုလူနာ ၅ ဦး ထပ်မံ တွေ့ရှိခဲ့တယ်လို့ ပြည်နယ် ပြည်သူ့ကျန်းမာရေး ဦးစီးဌာနက အောက်တိုဘာ ၁၈ ရက်နေ့ ညပိုင်းမှာ ထုတ်ပြန်ပါတယ်။
ရောဂါပိုးတွေ့ရှိသူ ၅ ဦးမှာ မော်လမြိုင် သံလွင်အေး အအေးအခန်းစက်ရုံ ကိုဗစ်လူနာကတဆင့် ရောဂါပိုးကူးစက်ခံရသူ ၁ ဦးနဲ့ ကျန် ၄ ဦးဟာ ကုန်တင်ယာဉ်မောင်းနဲ့ ယာဉ်နောက်လိုက်တွေ ဖြစ်တယ်လို့ ဆိုပါတယ်။
ကုန်တင်ယာဉ်မောင်းနဲ့ ယာဉ်နောက်လိုက်တွေကို ရေးမြို့နယ် ခေါဇာလမ်းဝက စစ်ဆေးရေးဂိတ်နဲ့ ကျိုက်ထိုမြို့နယ်က စစ်တောင်း ကိုဗစ် စစ်ဆေးရေးဂိတ်မှာ ရောဂါပိုး ရှိ မရှိ စစ်ဆေးရာမှ ရောဂါပိုးတွေ့ရှိခဲ့တာပါ။
လက်ရှိမှာတော့ ရောဂါပိုး တွေ့ရှိသူ ၅ ဦးစလုံးကို မော်လမြိုင်ပြည်သူ့ဆေးရုံကို ပြောင်းရွှေ့ကုသပေးထားပါတယ်။
မွန်ပြည်နယ်မှာ အောက်တိုဘာ ၁၉ ရက်နေ့ နေ့လယ်ပိုင်းအထိ ကိုဗစ်-၁၉ အတည်ပြုလူနာ ၅၁၆ ဦး၊ အဲဒီထဲမှာ လူနာ ၉ ဦး သေဆုံးပြီး ဆေးရုံ ဆင်းခွင့်ရသူ ၃၀၀ ကျော် ရှိပြီလို့ သိရပါတယ်။
