မြန်မာ-ထိုင်း ချစ်ကြည်ရေးတံတားအမှတ်-၂ ယာယီပိတ်မည်ဟု တပ်ခ်ခရိုင်မှူးပြော
DVB
·
October 17, 2020
ကရင်ပြည်နယ် မြဝတီမြို့နဲ့ မဲဆောက်မြို့ကို ဆက်သွယ်ထားတဲ့ မြန်မာ-ထိုင်း ချစ်ကြည်ရေးတံတားအမှတ်-၂ ကို ယာယီ ၇ ရက် ပိတ်သွားမယ်လို့ တပ်ခ်ခရိုင်မှူးက ပြောကြားလိုက်ပါတယ်။
မြဝတီမြို့တဘက်ကမ်း ထိုင်းနိုင်ငံ မဲဆောက်မြို့တွင်း ရွှေ့ပြောင်းမြန်မာ နှစ်ဦးမှာ ကိုဗစ်-၁၉ ရောဂါတွေ့ရှိခဲ့ပြီး ထိတွေ့သူ ၉ ဦးကို စစ်ဆေးချက်အရ ၃ ဦးမှာ ပိုးတွေ့ကြောင်း အောက်တိုဘာ ၁၇ ရက်နေ့က အတည်ပြုခဲ့တာလို့ ဆိုပါတယ်။
ဒါကြောင့် ဗိုင်းရပ်စ်ကူးစက်မှု မထိန်းချုပ်နိုင်မှာကို စိုးရိမ်တဲ့အတွက် မြန်မာ-ထိုင်း ချစ်ကြည်ရေးတံတားအမှတ်-၂ ကို ယာယီပိတ်ထားမယ်လို့ သတင်းစာရှင်းလင်းပွဲမှာ တပ်ခ်ခရိုင်မှူး နိုင်ဖုန်းရပ် ဖိလုံးရပ်က ပြောဆိုခဲ့ပါတယ်။
နယ်စပ်ပိတ်ပြီး လုံခြုံရေးတင်းကျပ်ထားသလို မဲဆောက်မြို့တွင်းမှာလည်း ဘုန်းတော်ကြီးကျောင်း၊ ဗလီကျောင်းနဲ့ အခြားလူစုလူဝေးနေရာတွေ၊ စားသောက်ဆိုင်တွေကိုလည်း ကျန်းမာရေးစစ်ဆေးမှုတွေ အောက်တိုဘာလ ၁၇ ရက်နေ့က စတင် ပြုလုပ်သွားမယ်လို့ ဆိုပါတယ်။
ကိုဗစ်-၁၉ အတည်ပြုလူနာ ၅ ဦးတွေ့ရှိခဲ့တဲ့ မဲဆောက်မြို့ ထုံထောက် ရပ်ကွက်ကို အသွားအလာကန့်သတ်ထားသလို စာသင်ကျောင်း ၅ ကျောင်းကိုလည်း ယာယီပိတ်ထားမယ်လို့ သိရပါတယ်။
ကိုဗစ်-၁၉ ရောဂါ ထိန်းချုပ်နိုင်ဖို့အတွက် မြန်မာ-ထိုင်းချစ်ကြည်ရေးအမှတ် ၂ တံတားကို အခုရက်ပိုင်းအတွင်း ယာယီ ၇ ရက်ပိတ်သွားမှာဖြစ်ပြီး ပြန်ဖွင့်နိုင်ဖို့ ကြိုးပမ်းသွားမယ်လို့လည်း တပ်ခ်ခရိုင်မှူးက ပြောဆိုပါတယ်။
ပြီးခဲ့တဲ့ အောက်တိုဘာ ၈ ရက်နေ့ကလည်း မြန်မာဘက်ခြမ်းကနေ ဝင်လာတဲ့ ကုန်တင်ကားပေါ်က မြန်မာ ၂ ဦးထံမှာ ကိုဗစ်-၁၉ ပိုးကူးစက်ခံထားရတာကို တွေ့ရှိပြီးတဲ့နောက် ထိုင်းဘက်ခြမ်းက ပြည်သူတွေဟာ မြန်မာဘက်ကနေ လူရော ကုန်တင်ကားပါ အဝင်မခံဖို့ အမှတ်-၂ ချစ်ကြည်ရေး တံတားကို ပိတ်ပေးဖို့ ဆန္ဒပြခဲ့ကြပါသေးတယ်။
မဲဆောက်မြို့သူမြို့သားတွေဟာ သူတို့ရဲ့ ကျန်းမာရေးနဲ့လုံခြုံရေးကို ကာကွယ်ပေးဖို့၊ မြန်မာ ဘက်ကလူတွေ အဝင်မခံဖို့ အောက်တိုဘာ ၁၁ ရက်မှာ တစ်ကြိမ် ၁၄ ရက်နေ့မှာ တကြိမ် ဆန္ဒပြခဲ့ကြပါတယ်။
ဖိုးစီ
