လပွတ္တာတွင် ဆိုက်ကားဆရာ ၆၅၀ အတွက် မြို့ခံများစုပေါင်းပြီး လှူဒါန်း
DVB
·
October 12, 2020
ဧရာဝတီတိုင်း၊ လပွတ္တာမြို့နယ်မှာ ကိုဗစ်-၁၉ ကပ်ဘေးကာလ စားဝတ်နေရေး အခက်အခဲ ဖြစ်နေတဲ့ ဆိုက်ကားဆရာတွေအတွက် အောက်တိုဘာ ၁၁ ရက်နေ့က အခြေခံစားသုံးကုန်တွေ လှူဒါန်းခဲ့ပါတယ်။
အနှေးယာဉ်ဆိုက်ကားဆရာတွေ အခြေခံစားသုံးကုန်တွေ လှူဒါန်းတာကို အဖြူရောင် ဧရာဝတီက ဦးဆောင်ပြီး မြို့ခံအလှူရှင်တွေနဲ့ ပူးပေါင်းလုပ်ဆောင်ခဲ့တာဖြစ်တယ်လို့ အဖြူရောင် ဧရာ၀တီအဖွဲ့မှ ကိုစိုးသီဟမင်းက ဒီဗွီဘီကိုပြောပါတယ်။
"အဓိကတော့ ကိုဗစ်ကာလမှာ အားလုံးက စားဝတ်နေရေးအခက်အခဲဖြစ်နေတာပါ။ ပြီးခဲ့တဲ့ ရက်က ရပ်ကွက်တွေကို လှူပေးခဲ့ပါတယ်။ အခုလုပ်တာကတော့ ကျနော်တု့်အဖွဲ့က ဦးဆောင်ပြီး မြို့ခံအလှူရှင်တွေနဲ့ ပူးပေါင်းပြီးတော့ ဆိုက်ကား ဆရာတွေအတွက် လှူပေးဖြစ်တာပါ”လို့ ပြောပါတယ်။
အဖြူရောင်ဧရာ၀တီအဖွဲ့နဲ့ မြို့ခံအလှူရှင်တွေပူးပေါင်းပြီး အနှေးယာဉ်ဆိုက်ကား ဆရာ ၆၅၀ ဦးအတွက် ၁ ဦးကို ဆန် ၂ ပြည်၊ ကြက်ဥ ၂ လုံး၊ ခေါက်ဆွဲထုပ် ၂ ထုပ်၊ အအေးနဲ့ ကိတ်မုန့်တွေ ပေးဝေခဲ့တာဖြစ်တယ်လို့ ဆိုပါတယ်။
လပွတ္တာမြို့မှာနေထိုင်သူတွေအနေနဲ့ စားဝတ်နေရေးအခက်အခဲရှိလာရင် အဖြူရောင် ဧရာဝတီအဖွဲ့ထံ ဆက်သွယ်ပြီး အကူညီတောင်းခံနိုင်လာရင်လည်း အဖွဲ့အနေနဲ့ ကူညီပေးသွားမှာ ဖြစ်တယ်လို့ အဖြူရောင်ဧရာ၀တီအဖွဲ့မှ ကိုစိုးသီဟမင်းက ဒီဗွီဘီကိုပြောပါတယ်။
လပွတ္တာမြို့အခြေစိုက် အဖြူရောင်ဧရာ၀တီအဖွဲ့ဟာ သဘာဝဘေးကယ်ဆယ်ရေး လုပ်ငန်း တွေ ကိုလုပ်ဆောင်နေတဲ့ အဖွဲ့ဖြစ်ပြီး ကိုဗစ်ကာလ စား၀တ်နေရေးအခက်အခဲရှိနေတဲ့ အိမ်ထောင်စု တွေကို ထောက်ပံ့ပေးနေသလို ဆွမ်းအခက်အခဲရှိတဲ့ သံဃာတော်များအတွက်လည်း ဆွမ်းခံပေး တာတွေ ပြုလုပ်ပေးနေတာပါ။
သတင်း - မင်းထက်မုန်း (ပုသိမ်)၊ ဓာတ်ပုံ - အဖြူရောင်ဧရာဝတီ
