ကရင်ပြည်နယ်တွင် အထူးရဲနှင့်ယာဉ်မောင်းများကို ကိုဗစ်-၁၉ စစ်ဆေး၊၂ ဦး ပိုးတွေ့
DVB
·
October 10, 2020
ကရင်ပြည်နယ်မှာ အောက်တိုဘာ ၉ ရက်နေ့က အထူးရဲနဲ့ ကုန်တင်ယာဉ်မောင်း ယာဉ်နောက်လိုက်တွေကို ကိုဗစ်-၁၉ စစ်ဆေးတာမှာ ၂ ယောက် ပိုးတွေ့ခဲ့တယ်လို့ ပြည်နယ်အစိုးရက ထုတ်ပြန်ပါတယ်။
RDT test kit နဲ့ စစ်ဆေးနေတာဖြစ်ပြီး ဘားအံမြို့နယ် သစ္စာထွန်းဆီဆိုင် စစ်ဆေးရေးဂိတ်(ဒုံသမိ)မှာ ကုန်တင်ယာဉ်မောင်းယာဉ်နောက်လိုက်တွေကို စစ်ဆေးရာကနေ ၁ ယောက်၊ သံတောင်ကြီးမြို့နယ်က အထူးရဲတပ်ဖွဲ့ဝင်တွေကို စစ်ဆေးရာကနေ ၁ ယောက် တွေ့ခဲ့ရတာပါ။
မနေ့ကညနေအထိ ကရင်ပြည်နယ်ထဲမှာ ဓာတ်ခွဲအတည်ပြုလူနာပေါင်း ၆၆ ယောက် တွေ့ထားရပြီး ၁ ယောက်သေဆုံးခဲ့သလို လက်ရှိဆေးရုံတွေမှာတော့ ၁၆ ယောက် ရှိနေပါတယ်။
အောက်တိုဘာ ၈ ရက်ကလည်း မြဝတီမြို့နယ် ကုန်သွယ်ရေးဇုန် စစ်ဆေးရေးဂိတ်မှာ စစ်ဆေးရာကနေ ပိုးတွေ့လူနာ ၁ ယောက်၊ ကော့ကရိတ်မြို့နယ်မှာ အထူးရဲတွေကို စစ်ဆေးရာကနေ ၁ ယောက် တွေ့ခဲ့ရပါတယ်။
ကရင်ပြည်နယ်မှာ ပိုးတွေ့လူနာတွေ တွေ့နေရပြီး ရောဂါကူးစက်တာ မြန်လာနိုင်တာကြောင့် ပြည်သူတွေအနေနဲ့ ကိုဗစ်-၁၉ ကူးစက်ရောဂါ ကြိုတင်တားဆီးကာကွယ်ရေး လမ်းညွှန်ချက်တွေကို တိတိကျကျ လိုက်နာကျင့်သုံးနေထိုင်ကြဖို့ ကရင်ပြည်နယ် အစိုးရအဖွဲ့က တိုက်တွန်းထားပါတယ်။
