မိတ္ထီလာတွင် ညမထွက်ရအမိန့် ဖောက်ဖျက်သူ ၃ ဦးကို ထောင်ဒဏ် ၁ လစီချမှတ်
DVB
·
October 7, 2020
မန္တလေးတိုင်း၊ မိတ္ထီလာမြို့ ပြည်သာယာ (တောင်)၄ လမ်းနဲ့ ၅ လမ်းအကြားမှာ အောက်တိုဘာ ၆ ရက်မနက် ၂ နာရီက ညမထွက်ရ ဒေသန္တရအမိန့်ကို ဖောက်ဖျက်ပြီး သွားလာနေသူ ရန်နိုင်ဦး အပါ ၃ ဦးကို မိတ္ထီလာမြို့နယ်တရားရုံးက အလုပ်မဲ့ ထောင်ဒဏ် ၁ လစီချမှတ်လိုက်ပါတယ်။
မိတ္ထီလာအမှတ်(၃)ရဲစခန်း စခန်းမှူးရဲအုပ်ဝင်းမြင့်ဦးက “ သာစည်မြို့နယ်ဘက်က လာတဲ့ သူတွေပါ။ ဒီနေ့မနက် ၂နာရီလောက် အချိန်မတော်ကြီးမှာ လှည့်ကင်းလှည့်တဲ့အဖွဲ့နဲ့တွေ့တာ ဒုမြို့နယ်အုပ်ချုပ်ရေးမှူးက တရားလို လုပ်ပါတယ်"လို့ ပြောပါတယ်။
မိတ္ထီလာမြို့နယ်မှာ စက်တင်ဘာလအတွင်း ညမထွက်ရ ဒေသန္တရအမိန့် ဖောက်ဖျက်သူ တွေကို အပြစ်ဒဏ်ချမှတ်ခဲ့တာဟာ စက်တင်ဘာလ ၄ ရက်က ၄ ဦး၊ စက်တင်ဘာ ၈ ရက်နေ့က ၆ ဦး၊ စက်တင်ဘာ ၁၄ ရက်က ၃ ဦး စုစုပေါင်း ၁၃ ဦးရှိခဲ့ပါတယ်။
အောက်တိုဘာလထဲမှာ အခုအမိန်ချတဲ့ ၃ ဦးအပါနဲ့ ဆိုရင် ၂ လပေါင်း ၁၆ ဦး ရှိခဲ့ပြီ ဖြစ်ပါတယ်။
ညမထွက်ရ ဒေသန္တရအမိန့်ကို ဖောက်ဖျက်ကျူးလွန်ကြသူ ၃ ဦးဟာ သာစည်မြို့နယ် ယင်းမာရိုးရွာက ဖြစ်ပြီး ဒုတိယ မြို့နယ် အုပ်ချုပ်ရေးမှူးက တရားလိုလုပ်ပြီး တရားစွဲဆိုခဲ့တာပါ။
သတင်း/ဓာတ်ပုံ-မောင်မောင်လင်း
