ကျောက်မဲမြို့နယ်၌ တိုက်ပွဲများပြန်ဖြစ်နေသဖြင့် ဒေသခံရွာသားများ စစ်ဘေးရှောင်
DVB
·
October 7, 2020
အန်စီအေ တနိုင်ငံလုံးပစ်ခတ်တိုက်ခိုက်မှု ရပ်စဲရေးစာချုပ်မှာ လက်မှတ်ထိုးထားတဲ့ RCSS/SSA ရှမ်းလက်နက်ကိုင်အဖွဲ့နဲ့ တပ်မတော်တို့အကြား ရှမ်းပြည်နယ်မြောက်ပိုင်း၊ ကျောက်မဲမြို့နယ်မှာ လတ်တလော တိုက်ပွဲတွေ ပြန်ဖြစ်ပွားနေတာကြောင့် ဒေသခံရွာသား ၈၀၀ ကျော် စစ်ဘေးတိမ်းရှောင်ထွက်ပြေးနေကြရပါတယ်။
ခုရက်ပိုင်းအတွင်း စစ်ဘေးရှောင်လာသူ လူဦးရေ ၈၁၅ ယောက်ဟာ တောင်ထိပ်ရွာနဲ့ ပုံဟိုးဘုန်းကြီးကျောင်းမှာ ခိုလှုံနေကြတယ်လို့ ကျောက်မဲ တိုက်ပွဲရှောင်ကော်မတီဝင် ကိုသားဇော် က ပြောပါတယ်။
စစ်ဘေးဒုက္ခသည်တွေကို သီပေါ၊ ကျောက်မဲ၊ နောင်ပိန်ရှိ အရပ်ဖက်အဖွဲအစည်းတွေက ကူညီထောက်ပံ့ပေးနေပြီး နှစ်ရက်၊ သုံးရက်အတွက် အဆင်ပြေပေမယ့် လူဦးရေများတဲ့အတွက် ရက်ရှည် ထောက်ပံ့နိုင်ဖို့ မဖြစ်နိုင်ဘူးလို့ ပြောပါတယ်။
ကျောက်မဲမြို့နယ် ရင်ကွဲတောင်အနီး အောက်တိုဘာ ၆ ရက် မနက် ၁၀ နာရီကျော်က တိုက်ပွဲဖြစ်ပွားခဲ့ပြီး ညနေ ၄ နာရီလောက်က နားပြိန်းကျေးရွာအုပ်စုလွယ်ဆာမှာ သေနတ်သံတွေ ကြားရပြီး လက်ရှိအချိန်အထိ စစ်ရေးအခြေအနေ တင်းမာနေတယ်လို့ နမ့်ခုံးရှမ်းများ ပရဟိတအသင်း (ကျောက်မဲအသင်းခွဲ)မှ ပြောရေးဆိုခွင့်ရှိသူ ကိုစိုင်းလွမ့်ခေးက ပြောပါတယ်။
ကျောက်မဲမြို့နယ်အတွင်း အောက်တိုဘာ ၂ ရက်ကစပြီး တိုက်ပွဲတွေ ပြန်လည် ဖြစ်ပွားနေတာဖြစ်ပြီး အောက်တိုဘာ ၄ ရက်နေ့ကလည်း ကျောက်မဲမြို့နယ် ခန့်ခဲကျေးရွာရှိ နေအိမ်တစ်လုံးပေါ်ကို လက်နက်ကြီးကျည်ကျလို့ အမျိုးသားတစ်ဦး ဒဏ်ရာရသွားပါတယ်။
သတင်း- Pra Jaw
ဓာတ်ပုံ- စိုင်းလွမ့်ခေး
