မွန်ပြည်နယ်က ဆရာဝန် ၂ ဦးအပါအဝင် ကျန်းမာရေး ဝန်ထမ်း ၃ ဦး ဆေးရုံဆင်းခွင့်ရ
DVB
·
October 3, 2020
မွန်ပြည်နယ်က ကိုဗစ်-၁၉ အတည်ပြုလူနာ ဆရာဝန် ၂ ဦးအပါအဝင် ကျန်းမာရေး ဝန်ထမ်း ၃ ဦးကို အောက်တိုဘာ ၂ ရက်နေ့မှာ ဆေးရုံဆင်းခွင့် ရရှိခဲ့ပါတယ်။
ဆရာဝန် ၂ ဦးဟာ မော်လမြိုင် ပြည်သူ့ဆေးရုံရဲ့ အထွေထွေရောဂါ အထူးကုပြင်ပ လူနာဌာနမှာ လူနာတွေကို စောင့်ကြည့်ကုသပေးရာမှ စက်တင်ဘာ ၂၀ ရက်နေ့က ကိုဗစ်-၁၉ ရောဂါပိုး ကူးစက်ခဲ့ရတာပါ။
ကျန် ကျန်းမာရေးဝန်ထမ်း ၁ ဦးဖြစ်တဲ့ သူနာပြုမှာလည်း မော်လမြိုင်ပြည်သူ့ဆေးရုံမှာပဲ လူနာတွေကို စောင့်ကြည့်ကုသပေးရာမှ စက်တင်ဘာ ၂၂ ရက်နေ့က ကိုဗစ်ရောဂါပိုး ထပ်မံကူးစက်ခံခဲ့ရတာပါ။
ဒါ့အပြင် မွန်ပြည်နယ်က အသက်ငယ်ဆုံး ၃ လအရွယ် ကိုဗစ်လူနာ ကလေးငယ်လည်း အောက်တိုဘာ ၂ ရက်နေ့ ညနေပိုင်းမှာ ဆေးရုံဆင်းခွင့်ရရှိခဲ့ပါတယ်။
ဆေးရုံဆင်းခွင့် ရရှိသွားတဲ့သူတွေကို နေအိမ်မှာ ၇ ရက်ကြာ နေထိုင်ပေးကြဖို့နဲ့ ရောဂါလက္ခဏာတခုခု ခံစားရရင် ဆေးရုံ လာပြန်ပြပေးကြဖို့ မှာကြားထားတယ်လို့ မွန်ပြည်နယ် ပြည်သူ့ကျန်းမာရေးဦးစီးဌာန ဒုပြည်နယ်ဦးစီးမှူး ဒေါက်တာ ဝတ်မှုံက DVB ကိုပြောပါတယ်။
မွန်ပြည်နယ်မှာတော့ စက်တင်ဘာ ၃ ရက်နေ့ မနက်ပိုင်းအထိ ကိုဗစ်-၁၉ အတည်ပြုလူနာ ၂၉၄ ဦးအထိ ရှိလာခဲ့တာ ဖြစ်ပါတယ်။
