ကျေးသီးတွင် ကျပ်သိန်း ၅၅၀၀ ကျော်တန်ဖိုးရှိ စိတ်ကြွဆေးပြားများ သိမ်းဆည်းရမိ
DVB
·
September 20, 2020
ရှမ်းပြည်နယ်(တောင်ပိုင်း) ကျေးသီးမြို့နယ်မှာ ငွေကျပ် သိန်း ၅၅၀၀ ကျော် တန်ဖိုးရှိတဲ့ စိတ်ကြွရူးသွပ်ဆေးပြားတွေကို ရပ်ထားတဲ့ကားတစီးပေါ်ကနေ သိမ်းဆည်းရမိတယ်လို့ မူးယစ်ဆေးအလွဲသုံးမှုတားဆီးထိန်းချုပ်ရေးဗဟိုကော်မတီက ထုတ်ပြန်ပါတယ်။
ကျေးသီးမြို့နယ် ကျေးသီး-မိုင်းကိုင်သွားကားလမ်းဘေးမှာ TOYOTA HILUX ကားတစီး မသင်္ကာဖွယ်ရပ်တန့်ထားတယ်ဆိုတဲ့ သတင်းအရ စက်တင်ဘာ ၁၈ ရက်မနက်ပိုင်းက ကျေးသီး မြို့မရဲစခန်းက တပ်ဖွဲ့ဝင်တွေ သွားရောက်စစ်ဆေးခဲ့ပါတယ်။
ကားပေါ်မှာ ယာဉ်မောင်းမတွေ့ရဘဲ ကာလပေါက်ဈေးကျပ်သိန်း ၅၅၅၇ တန်ဖိုးရှိ စိတ်ကြွရူးသွပ်ဆေးပြား ၅၅၅,၇၅၀ ပြားကို သိမ်းဆည်းရမိပြီး ကျေးသီးမြို့မရဲစခန်းမှာ မူးယစ်ဆေးဝါးနဲ့စိတ်ကိုပြောင်းလဲစေသော ဆေးဝါးများဆိုင်ရာဥပဒေနဲ့အမှုဖွင့်ကာ ကွင်းဆက်တွေ ကို ဖော်ထုတ်စစ်ဆေးနေတယ်လို့ သိရပါတယ်။
