ဗိုလ်တထောင် ချမ်းမြေ့ဈေးက ဈေးကောက်နှင့် ဈေးသည် ၅ ဦး ကိုဗစ်-၁၉ ကူးစက်ခံရ
DVB
·
September 17, 2020
ရန်ကုန်တိုင်း ဗိုလ်တထောင်မြို့နယ်ရှိ ဈေးတခုမှာ ဈေးကောက်နဲ့ဈေးသည် ၅ ဦး ကိုဗစ်-၁၉ ရောဂါပိုးတွေ့ခဲ့ ပြီးနောက်မှာ ရပ်ကွက်ထဲ ဈေးကားတွေနဲ့ လှည့်လည်ရောင်းချဖို့ ပြင်ဆင်နေပါတယ်။
ဗိုလ်တထောင်မြို့နယ်က ချမ်းမြေ့ဈေးမှာ ဈေးကောက် ၂ ဦး၊ ဝက်သားသည် ၂ ဦး၊ ကြက်သားသည် ၁ ဦးတို့မှာ ကိုဗစ်-၁၉ ရောဂါပိုး တွေ့ရတယ်လို့ ဗိုလ်တထောင်မြို့နယ် ပြည်သူ့လွှတ်တော်ကိုယ်စားလှယ် ဒေါ်မေစိုးက ပြောပါတယ်။
အခုလက်ရှိဈေးကိုတော့ ဖွင့်လှစ်ထားပြီး ပိုးတွေ့ရှိတဲ့ဈေးသည်တွေရဲ့ နေရာကိုတော့ lockdown ချထားပါတယ်။ ဒါကြောင့် ကိုဗစ် ပထမလှိုင်းတုန်းကလို ဈေးကားနဲ့ လှည့်လည်ရောင်းဖို့ တာဝန်ရှိသူတွေက ဆွေးနွေးနေကြပါတယ်။
ဈေးတွေမှာလည်း social distancing လုပ်ဖို့အခြေအနေကလည်း မလွယ်ကူတဲ့ အခြေအနေ ရှိနေပါတယ်။ ဒါ့အပြင်ပျံကျဈေးတွေကလည်း အခုချိန်မှာအန္တရာယ်ရှိတဲ့အခြေအနေဖြစ်ပြီး ထိန်းချုပ်ဖို့ အဖွဲ့အစည်းလိုအပ်နေတယ်လို့ ဆိုပါတယ်။
လက်ရှိ တချို့မြို့နယ်တွေကလည်း ဈေးမှာလူနည်းသွားအောင် ဈေးသည်တွေကို စုံရက် မရက် ခွဲရောင်းခိုင်းတာတွေလည်း ရှိနေပါတယ်။
မြို့နယ်စည်ပင်သာယာတာဝန်ရှိသူတွေကလည်း သား၊ငါးနဲ့ စားသောက်ကုန်ဆိုင်တွေပဲ အခုချိန်မှာ အဓိကဖွင့်လှစ်ရောင်းချဖို့ ဈေးရောင်တဲ့ပြည်သူတွေကို မေတ္တာရပ်ခံထားပါတယ်။
သတင်း-ခင်ငြိမ်းချမ်း
