ရန်ကုန်၊ ဗိုလ်တထောင်မြို့နယ်၊ ဘိုကလေးစျေးအနောက်က ၄ ထပ်တိုက်မှာ ဒီနေ့ နိုဝင်ဘာ ၁၂ ရက် မနက်ပိုင်းက မီးလောင်ခဲ့ပြီး လူ ၁၃ ယောက် ထိခိုက်ဒဏ်ရာ ရရှိခဲ့တယ်လို့ မြန်မာမီးသတ်ဌာနချုပ်က ထုတ်ပြန်ပါတယ်။

မီးလောင်မှုကို မနက် ၆ နာရီခွဲလောက်မှာ ရပ်ကွက်နေသူတွေက ဖုန်းဆက် အကြောင်းကြားခဲ့တာဖြစ်ပြီး ဗိုလ်တထောင်မီးသတ်နဲ့ Level 1 အဆင့် မီးငြှိမ်းသတ်ယာဉ် ရေသယ်ယာဉ်တွေနဲ့ ထွက်ခွာငြှိမ်းသတ်ခဲ့ကြပါတယ်။ 

ရပ်ကွက်နေသူတယောက်က “မနက် ၆ နာရီကျော်ကတည်းက မီးခိုးတွေ အူထွက်နေတာ။ မီးတောက်က ကြီးတယ်။ ဘိုကလေးဈေးအနောက်က တိုက်တန်းတွေမှာ လောင်တာ။ အပေါ်ထပ်ကလူတွေက ခေါင်မိုးပေါ် တက်ပြေး သူတွေလည်း ရှိတယ်။ မြင်ရသလောက် မီးသတ်ကရိန်းနဲ့ ဆွဲ‌ထုတ်ရတဲ့သူတွေလည်း ရှိတယ်” လို့ ပြောပါတယ်။

မီးလောင်မှု‌ကြောင့် မီးစွဲလောင်သွားတဲ့ တိုက်ခန်းတွေမှာပိတ်မိ‌နေတဲ့ အသက် ၇၀ အရွယ် အဘွား ၁ ယောက် အပါအဝင် အမျိုးသမီး ၅ ယောက်၊ အမျိုးသား ၈ ယောက်တို့ကို မီးသတ်တပ်ဖွဲ့ဝင်တွေက အချိန်မီကယ်ဆယ်နိုင်ခဲ့တာကြောင့် မီးခိုးမွှန်၊ အပူလောင် ဒဏ်ရာတွေပဲ ရရှိခဲ့ပါတယ်။

မီးသတ်တပ်ဖွဲ့တွေနဲ့ ကယ်ဆယ်ရေးအသင်းတွေ ပူးပေါင်းငြှိမ်းသတ်ခဲ့တာကြောင့် မနက် ၇ နာရီလောက်မှာ မီးထိန်းနိုင်ခဲ့ကာ ၇နာရီ ၁၇ မိနစ်မှာ မီးငြိမ်းသွားပါတယ်။

မီးလောင်မှုအတွင်း ၄ ထပ်တိုက်ရဲ့တတိယထပ်နဲ့ စတုတ္ထထပ်က တိုက်ခန်း ၄ ခန်းဟာ ပျက်စီးသွားပြီး ဒုတိယထပ် ညာဘက်ခြမ်း တိုက်ခန်းလည်း ပျက်စီးမှုအနည်းငယ် ရှိခဲ့ပါတယ်။ 

အရပ်ဖက်ကယ်ဆယ်ရေးအသင်းဝင်တယောက်က “ထိခိုက်သူ အမျိုးသား ၈ ဦး အမျိုးသမီး ၅ ဦးပါ။ သက်ကြီးအဖွားလည်း ပါတယ်။ အမျိုးသားတွေရော အသက်‌ ၄၀ ကျော်တွေလည်း ပါတယ်။ ရန်ကုန်ဆေးရုံကြီး ပို့ဆောင်ထားပါတယ်။ တိုက်က လှေကားတွေက ကျဉ်းတော့ မီးသတ်တွေ ကူညီရတာခက်ခဲတယ်” လို့ ပြောပါတယ်။

မီးလောင်ရတဲ့ အကြောင်းအရင်းအမှန်နဲ့ ပျက်စီးမှုတန်ဖိုးကို မီးသတ်တပ်ဖွဲ့က စုံစမ်းစစ်ဆေးနေဆဲဖြစ်ပြီး ထိခိုက်လူနာ ၁၃ ယောက်ကို အရပ်ဘက် ကယ်ဆယ်ရေး အသင်းယာဉ်တွေနဲ့ ရန်ကုန်ပြည်သူ့ဆေးရုံကြီးကို ပို့ဆောင်ပေးထားပါတယ်။