Homeမြန်မာသတင်း
ပိုးတွေ့လူနာနှင့်ထိတွေ့ခဲ့သည့် လွိုင်ကော်က သားအမိနှစ်ဦးကို ဆေးရုံတွင် Quarantine ထားရှိ
ပိုးတွေ့လူနာနှင့်ထိတွေ့ခဲ့သည့် လွိုင်ကော်က သားအမိနှစ်ဦးကို ဆေးရုံတွင် Quarantine ထားရှိ
နော်နိုရင်း
·
September 17, 2020
ကိုဗစ်-၁၉ လူနာနဲ့ထိတွေ့ခဲ့တဲ့ ကယားပြည်နယ်၊ လွိုင်ကော်မြို့က သားအမိနှစ်ဦးကို ဆေးရုံမှာ Quarantine ထားရှိပြီး သူတို့ရဲ့နေအိမ်ကိုလည်း စက်တင်ဘာ ၁၆ ရက် ညနေပိုင်းကစပြီး အသွားအလာကန့်သတ်ထားလိုက်ပါတယ်။
လွိုင်ကော်မြို့ နာနတ်တောရပ်ကွက်နေ အမျိုးသမီးတစ်ဦးဟာ ပြင်ဦးလွင်မြို့နယ်ကို သွားရောက်ခဲ့စဉ် စက်တင်ဘာ ၆ ရက်နဲ့ ၇ ရက်နေ့က ကိုဗစ်-၁၉ ပိုးတွေ့လူနာဖြစ်တဲ့ ဆရာဝန်ထံမှာ သွားရောက်ဆေးကုသခဲ့ပြီး လွိုင်ကော်မြို့ကို စက်တင်ဘာ ၉ ရက်က ပြန်လည်ရောက်ရှိခဲ့တာ ဖြစ်ပါတယ်။
ကျန်းမာရေးဌာနက အဆိုပါဆရာဝန်မှာ ရောဂါပိုးတွေ့ရှိကြောင်းကြေညာပြီး နောက်မှာတော့ ဆေးကုသမှုခံယူခဲ့တဲ့ အမျိုးသမီးနဲ့လိုက်ပါသွားတဲ့ သမီးဖြစ်သူတို့ကို ဆေးရုံမှာ Quarantine ထားရှိလိုက်တာပါ။
သူတို့နဲ့ထိတွေ့ခဲ့တဲ့ မိသားစုဝင်တွေကိုလည်း အသွားအလာကန့်သတ်ပြီး အိမ်ကို Lockdown လုပ်ထားသလို သမီးဖြစ်သူ ကျန်းမာရေးဝန်ထမ်းနဲ့ ဆက်စပ်ခဲ့သူတွေရှိတဲ့အတွက် နမ့်ဘော်ဝမ်(ခ)ရပ်ကွက်ရှိ လွိုင်ကော်ခရိုင်ပြည်သူ့ကျန်းမာရေးဦးစီးဌာန ခရိုင်ရုံးနဲ့ ဝန်ထမ်းအိမ်ရာကိုလည်း မနေ့ညပိုင်းကစပြီး အသွားအလာ ကန့်သတ်ထားလိုက်ပါတယ်။
သူတို့ရဲ့ ဓာတ်ခွဲနမူနာမှာ ပိုးမတွေ့ရှိကြောင်း လွိုင်ကော်မြို့နယ် ကျန်းမာရေးဦးစီးဌာနက ဒီကနေ့ ထုတ်ပြန်ထားပြီး တောင်ကြီးမှာ ထပ်မံစစ်ဆေးထားတယ်လို့ သိရပါတယ်။
ကနေဦး စစ်ဆေးချက်အရ ပိုးမတွေ့ကြောင်း အဖြေထွက်ပေါ်ပေမယ့် ထပ်မံစစ်ဆေးဖို့ရှိ သေးတာကြောင့် အဆိုပါ အမျိုးသမီးနေအိမ်ကို သွားအလာကန့်သတ်ထားရှိဆဲဖြစ်ပါတယ်။
သူတို့ရဲ့ ဓာတ်ခွဲနမူနာအဖြေတွေအပေါ် မူတည်ပြီးတော့ လိုအပ်သလို ဆက်လက် ဆောင်ရွက်မယ်လို့လည်း မြို့နယ်ကျန်းမာရေးဌာနက ထုတ်ပြန်ထားပါတယ်။
လွိုင်ကော်ပြည်သူ့ဆေးရုံကြီးမှာ ပိုးမတွေ့ လူနာ ၂ ဦး၊ ဆေးစစ်ဆေးချက် စောင့်ဆဲ လူနာ ၄ ဦး စုစုပေါင်း ၆ ဦး ဆေးကုသမှုခံယူနေတယ်လို့ ကယားပြည်နယ်အစိုးရအဖွဲ့ရဲ့ စက်တင်ဘာ ၁၇ ရက် မနက်ထုတ်ပြန်ချက်အရ သိရပါတယ်။
ကယားပြည်နယ်မှာ ဒီကနေ့အထိ ကိုဗစ်-၁၉ ပိုးတွေ့ အတည်ပြုလူနာ ၁ ဦးမှ မရှိသေးပါဘူး။
