မလှိုင်မြို့နယ်တွင် ကျောင်းသူ ညီအစ်မ ၂ ဦး ရေနစ်သေဆုံး
DVB
·
September 10, 2020
မန္တလေးတိုင်း၊ မလှိုင်မြို့နယ်၊ မြင်းဦးလှည့်ကျေးရွာအုပ်စု ညောင်ကုန်းကျေးရွာ ချောင်းအတွင်းမှာ စက်တင်ဘာ ၉ ရက်နေ့က ရေဆင်းချိုးတဲ့ ကျောင်းသူ ညီအစ်မနှစ်ဦး ရေနစ်သေဆုံးသွားတယ်လို့ မြင်းဦးလှည့်အုပ်စုအုပ်ချုပ်ရေးမှူးက ပြောပါတယ်။
"ကျောင်းသူလေး ၂ ယောက်က ညီအစ်မအရင်းတွေပါ။ ကျောင်းတွေ ပိတ်ထားတော့ ညောင်ကုန်းရွာက အဘိုးအဘွားတွေဆီ အလည်လာရင်း ဖြစ်သွားတာ။ ညကရွာတဲ့မိုးက ချောင်းထဲမှာရေရှိနေတယ်၊ ချောင်းအကွေ့တခုမှာ လူကြီးတရပ်မြုပ်တဲ့ ချိုင့်ရှိတယ်။ ညီမငယ် အဲဒီချိုင့်ထဲ ကျသွားတာကို အစ်မက လိုက်ကယ်ရင်း အမပါ ရေနစ်သေဆုံးသွားတာပါ။"
ရေနစ်သေဆုံးသွားသူ ညီအစ်မနှစ်ဦးကတော့ ရုံးတောအုပ်စု ကျောင်းစုရွာနေ ၁၀ တန်းကျောင်းသူ မရွှန်းလဲ့နဒီ (၁၆နှစ်) နဲ့ ၇ တန်းကျောင်းသူ ညီမဖြစ်သူ မအိစိုင်းမွန်(၁၄နှစ်) ဖြစ်ပြီး ရေနစ်နေတာကို လယ်ယာလုပ်ငန်းခွင်သွားသူ တစ်ဦးက တွေ့ရှိလို့ ကယ်တင်ခဲ့ပေမယ့် သေဆုံးသွားခဲ့တယ်လို့ ဆိုပါတယ်။
မလှိုင်မြို့မရဲစခန်းတာဝန်ကျရဲအရာရှိက "ညီအမ နှစ်ယောက်လုံး သေဆုံးသွားတယ်။ ပြင်ပဒဏ်ရာ မတွေ့ရပါဘူး၊ သေမှုသေခင်း အမှုဖွင့်ထားတယ်" လို့ ပြောပါတယ်။
မောင်မောင်လင်း
