မကွေးမြို့တွင် ကိုဗစ်ကာလ တရားမဝင်ဖွင့်လှစ်ထားသည့် အနှိပ်ခန်းအား ဖမ်းဆီးအရေးယူ
DVB
·
September 4, 2020
မကွေးတိုင်း၊ မကွေးမြို့၊ ဖန်ခါးမြေဂေါက်ကလပ်ဟိုတယ်မှာ စက်တင်ဘာ ၄ ရက်နေ့ မနက်ပိုင်းက တရားမဝင်ဖွင့်လှစ်ထားတဲ့ အနှိပ်ခန်းတွေကို ဖမ်းဆီးအရေးယူထားတယ်လို့ မကွေးတိုင်းဒေသကြီး ရဲတပ်ဖွဲ့ကနေ သိရပါတယ်။
ဖန်ခါးမြေ ဂေါကလပ် ဟိုတယ် တတိယထပ်က အခန်းတွေမှာ BMMB Beauty Spa အမည်နဲ့ အနှိပ်ခန်းပြုလုပ်နေတာတွေ့ရလို့ ဝင်ရောက်ရှာဖွေရာမှာ မန်နေဂျာအပါအဝင် အမျိုးသား ၃ ဦး၊ အမျိုးသမီး ၁၀ ဦးဖမ်းဆီးရမိပြီး အနှိပ်ခန်းပြုလုပ်ရာမှာအသုံးပြုတဲ့ ဆက်စပ်ပစ္စည်းတွေ သိမ်းဆည်းခဲ့တယ်လို့ မကွေးတိုင်းဒေသကြီး ရဲတပ်ဖွဲ့မှူး ရဲမှူးကြီးလှိုင်တင့်က ပြောပါတယ်။
"ကိုဗစ်ကာလအတွင်းမှာ လူစုလူဝေးဖြစ်ပြီး ရောဂါကူးစက် ပြန့်ပွားနိုင်တဲ့ KTV၊ အနှိပ်ခန်း၊ စင်တင်တွေကို လုံးဝဖွင့်လှစ်ခွင့်ပြုမထားတဲ့အတွက် မကွေးမြို့နယ်ရဲတပ်ဖွဲ့မှူး ဦးဆောင်တဲ့ အဖွဲ့က ဝင်ရောက်ဖမ်းဆီးခဲ့တာ။”
အဲဒါကြောင့် မန်နေဂျာ ဝင်းဖြိုးနောင် အပါအဝင် ၁၃ ဦးကို ကိုဗစ်-၁၉ ရောဂါ ကာကွယ်ထိန်းချုပ်ရေး အမိန့်/ညွှန်ကြားချက်တွေကို လိုက်နာရန်ပျက်ကွက်ပြီး အနှိပ်ခန်းဖွင့်လှစ်တဲ့ အတွက် မကွေးမြို့မရဲစခန်းမှာ သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေပုဒ်မ-၂၅ နဲ့ အမှုဖွင့်အရေးယူထားတယ်လို့ ဆိုပါတယ်။
သတင်း-မင်းထီး
