ဟာသသရုပ်ဆောင် အောင်ရဲထွေး သေဆုံးမှုနှင့်ပတ်သက်ပြီး ပြန်ခေါ်သက်သေကို စစ်ဆေး
DVB
·
August 25, 2020
ဟာသသရုပ်ဆောင် အောင်ရဲထွေး သေဆုံးမှုနဲ့ တရားစွဲဆိုခံထားရသူ သုံးဦးအမှုနဲ့ ပတ်သက်လို့ ဒီကနေ့ ဩဂုတ်လ ၂၅ ရက်နေ့က ရန်ကုန် အရှေ့ပိုင်းခရိုင်တရားရုံးမှာ ရုံးထုတ်စစ်ဆေးပါတယ်။
ဒီအမှုဟာ မူလတရားရုံးက စွဲချက်တင်ထားတဲ့ ပုဒ်မတွေနဲ့ တရားပြန်လည်ရင်ဆိုင်ရတာ ဖြစ်တဲ့အတွက် ဒီနေ့မှာတော့ ကျန်ရှိနေတဲ့ ပြန်ခေါ်သက်သေတွေကို ဆက်လက်စစ်ဆေးနေတာပါ။
ဒီနေ့ရုံးချိန်းမှာ လာရောက်ထွက်ဆိုတဲ့ ပြန်ခေါ်သက်သေတစ်ဦးကတော့ တရားစွဲဆိုခံထားရသူ ၃ ဦးရဲ့ သူငယ်ချင်းဖြစ်ပြီး အခင်းဖြစ်စဉ် ညက အတူရှိခဲ့သူ ဖြစ်ကာ အမှုအတွက် ၃ ကြိမ်မြောက် လာရောက်ထွက်ဆိုထားသူလည်း ဖြစ်ပါတယ်။
မူလက ရဲစခန်းမှာ ထွက်ဆိုထားတဲ့ ထွက်ဆိုချက်တွေနဲ့ တရားခွင်မှာ ထွက်ဆိုချက်တွေက ကွဲလွဲမှု တချို့ရှိနေတာကြောင့် နှစ်ဘက်ရှေ့နေတွေက ပြန်လှန်မေးရာမှာတော့ ဒီနေ့ တရားခွင်မှာ ထွက်ဆိုသော ထွက်ဆိုချက်ဟာ အတည်ဖြစ်ကြောင်း ထွက်ဆိုခဲ့ပါတယ်။
ထွက်ဆိုချက်တွေကတော့ အခင်းဖြစ်ရာအချိန်က VVIP စင်ပေါ်မှာ သူနဲ့ အတူ တရားစွဲဆိုခံရသူ ၃ ဦးပါ ရှိနေပြီး ကခုန်နေကြောင်း၊ ခဏကြာတော့ စင်ပေါ်က ဝုန်းဒိုင်းအသံတွေကြားတော့ ကြောက်လန့် တကြား ပြေးဆင်းခဲ့ကြကြောင်းနဲ့ အဲဒီ အသံတွေ ကြားရာဆီကို သူတို့ လေးဦးစလုံး မသွားခဲ့ကြဘူးလို့ ထွက်ဆိုခဲ့ပါတယ်။
လာမယ့် ရုံးချိန်းကိုတော့ စက်တင်ဘာလ ၁ ရက်နေ့ကို ချိန်းဆိုထားပြီး နောက်ဆုံး ကျန်ရှိနေတဲ့ ပြန်ခေါ်သက်သေတစ်ဦးကို စစ်ဆေးသွားမှာ ဖြစ်ပါတယ်။ အဲဒီ ပြန်ခေါ်သက်သေတွေ စစ်ဆေးပြီးရင်တော့ တရားစွဲဆိုခံရသူ ၃ ဦးကို ဆက်လက်စစ်ဆေးသွားဖို့ ရှိပါတယ်။
သတင်း - နူးရာ
