စစ်ကိုင်းမြို့ ရတနာပုံတံတားပေါ်မှ ခုန်ချသွားသူ၏ ရုပ်အလောင်း တွေ့ရှိ
DVB
·
August 13, 2020
စစ်ကိုင်းမြို့၊ ရတနာပုံတံတားပေါ်ကနေ ဩဂုတ် ၁၁ ရက်နေ့က ခုန်ချသွားတဲ့ အမျိုးသား ၁ ဦးရဲ့ ရုပ်အလောင်းကို ဒီနေ့ မနက်က ပြန်လည်တွေ့ရှိခဲ့ပါတယ်။
သေဆုံးသူကို တံတားပေါ်ခုန်ချသွားတဲ့ရက်ကစပြီး ကယ်ဆယ်ရေးအဖွဲ့တွေက ရှာဖွေ ခဲ့ကြပေမယ့် မတွေ့ရှိရပဲ ဒီနေ့ စစ်ကိုင်းမြို့ မြဝတီဆိပ်ကမ်းမှာ အလောင်းပေါ်လာတဲ့အတွက် တွေ့ရှိခဲ့တာ ဖြစ်ပါတယ်။
အရေးပေါ်ကယ်ဆယ်ရေးအဖွဲ့ (စစ်ကိုင်း) မှ ကိုမင်းသန့်က “သူခုန်ချသွားတဲ့ရက်ကတည်းက အားလုံးပူးပေါင်းပြီး လိုက်ရှာတာ မတွေ့ဘူး၊ ဒီနေ့မှ အလောင်းက ပေါ်လာတာ။ ဆိပ်ကမ်းက လူတွေက အကြောင်းကြားလာလို့ သွားသယ်ကြရတယ်” လို့ ပြောပါတယ်။
တွေ့ရှိရတဲ့ ရုပ်အလောင်းဟာ စစ်ကိုင်းမြို့ တကောင်းရပ်ကွက်မှာနေထိုင်တဲ့ ကိုသိန်းထိုက် ဆိုသူဖြစ်တယ်လို့သိရပြီး ရုပ်လောင်းကိုတော့ စစ်ကိုင်းမြို့ပြည်သူ့ဆေးရုံက ရင်ခွဲရုံဆီ ပို့ဆောင်ထား တယ်လို့ သိရပါတယ်။
စစ်ကိုင်းမြို့မှာ ၂၀၁၉ ခုနှစ်က အင်းဝတံတားပေါ်ကနေ ၅ ကြိမ်၊ ရတနာပုံ တံတားပေါ်ကနေ ၂ ကြိမ် မြစ်အတွင်းခုန်ချသေဆုံးမှုတွေရှိခဲ့သလို ၂၀၂၀ ဇန်နဝါရီလတုန်းကလည်း ရတနာပုံ တံတားပေါ်ကနေ ခုန်ချသေဆုံးမှု ၁ ကြိမ် ဖြစ်ပွားခဲ့ပါတယ်။
သတင်း - ရန်နိုင်စိုး၊
ဓာတ်ပုံ - အရေးပေါ်ကယ်ဆယ်ရေးအဖွဲ့ (စစ်ကိုင်း)
