တရားဟောဆရာ စောဒေးဗစ်လားနှင့် ဦးဝေထွန်းတို့ကို ထောင်ဒဏ် ၃ လချမှတ်
ချမ်းမြေ့မောင်
·
August 6, 2020
သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေပုဒ်မ ၂၅ နဲ့ တရားစွဲခံထားရတဲ့ ခရစ်ယာန် တရားဟောဆရာ စောဒေးဗစ်လားနဲ့ ဦးဝေထွန်းတို့ကို ဩဂုတ် ၆ ရက် မနက်က မရမ်းကုန်းမြို့နယ် တရားရုံးက ထောင်ဒဏ် ၃ လစီ ပြစ်ဒဏ် ချမှတ်လိုက်ပါတယ်။
ခရစ်ယာန်တရားဟောဆရာ စောဒေးဗစ်လားနဲ့ နဝရတ်တေးသံသွင်းက ဦးဝေထွန်းတို့အမှုကို ဇူလိုင် ၂ ရက် ရုံးချိန်းမှာ စတင် စွဲချက်တင်ခဲ့ပြီ မရမ်းကုန်းမြို့နယ်တရားရုံးက ဒီကနေ့ ၁၄ ကြိမ်မြောက်ရုံးထုတ်ရာမှာ အပြစ်ရှိတယ်လို့ တရားသူကြီးက ဆုံးဖြတ် အပြီးသတ်အမိန့်ချမှတ်ခဲ့တာပါ။
ဒီအမှုကိုစွဲချက်တင်ပြီး ရက်ပေါင်း ၆၀ ကျော်အကြာမှာ ပြစ်ဒဏ်အမိန့်ချမှတ်ခဲ့တာဖြစ်ပြီး အမိန့်မှာ ချုပ်ရက်ထုတ်နုတ်ခံစားခွင့်ပြုတဲ့အတွက် စောဒေးဗစ်လားတို့ဟာ ထောင်ထဲမှာ ရက်သတ္တပတ် ၂ ပတ်လောက်ပဲနေရတော့မှာပါ။
ကိုဗစ်-၁၉ ကပ်ရောဂါကြောင့် လူစုလူဝေးနဲ့ လုပ်ရတဲ့ ပွဲလမ်းသဘင်တွေ ဘာသာရေးအခမ်းအနားတွေ မကျင်းပဖို့ အမိန့်ထုတ်ပြန်ထားတာကို မလိုက်နာပဲ စောဒေးဗစ် (ခ) စောဒေးဗစ်လားနဲ့ ဦးဝေထွန်းတို့ နှစ်ဦးက ဧပြီ ၇ ရက်မှာ လူစုလူဝေးနဲ့ ဝတ်ပြုခြင်း၊ ဓမ္မတေးသီဆို ဆုတောင်းတာတွေ ပြုလုပ်ခဲ့လို့ တရားစွဲခံရတာဖြစ်ပါတယ်။
Photo - Ye Myo Khant / MPA
