မိတ္ထီလာမြို့နယ်၌ မိုးသည်းထန်စွာရွာသွန်းပြီး ကျေးရွာအချို့ရေဘေးသင့်
DVB
·
August 4, 2020
မန္တလေးတိုင်း၊ မိတ္ထီလာမြို့နယ်၊ ဂဠုံကုန်းကျေးရွာအုပ်စုမှာ သြဂုတ် ၂ ရက်နဲ့ ၃ ရက် ဆက်တိုက် မိုးသည်းထန်စွာရွာသွန်းတာကြောင့် ရွာတွေထဲရေဝင်လာကာ သဲတောလေးရွာအဝင်တံတားပျက်စီးသွားတယ်လို့ ကျေးရွာအုပ်ချုပ်ရေးမှူးက ပြောပါတယ်။
ဂဠုံကုန်းကျေးရွာအုပ်စု အုပ်ချုပ်ရေးမှူးဦးသန်းဦးက "မိုးတအားရွာတယ်။ ကိုယ်ထူကိုယ်ထ တည်ဆောက်ထားတဲ့ သဲတောလေးရွာအဝင် တံတား ကျိုးပျက်သွားတယ်။ လူကူးလို့ရအောင် သံဘောင်ကြီးတင်ပေးထားတယ်။ ပျော်ဘွယ်ရွာ၊ မြင်သာရွာနဲ့ သဲတောလေးရွာတွေထဲလည်း ရေတွေ ဝင်နေတယ်။ ရေအနက် ၂ ပေကျော်လောက်တော့ရှိမယ်။ အခုထိတော့ အိမ်တွေမှာ နေလို့ ရသေးတယ် မိုးရွာတာ ဒီထက်ပိုများလာရင် နေမရတော့ဘူး။" လို့ ပြောပါတယ်။
နတ်စင်ချောင်း တလင်းကုန်းချောင်းတွေမှာ မိုးများတာကြောင့် မိုးရေတွေက သဲတောလေးရွာအဝင်ရေဆိုးထုတ်မြောင်းထဲဝင်ရောက်ပြီးအကျယ် ၁၂ ပေ အရှည်ပေ ၄၀ ရှိတဲ့ ကိုယ်ထူကိုယ်ထတံတားကျိုးပျက်သွားခဲ့တာပါ။ အဲဒီချောင်းမြောင်းတွေထဲက ရေတွေဟာ မိတ္ထီလာကန်ထဲကို ဝင်ပါတယ်။
သဲတောလေးရွာမှာ လူနေအိမ်ခြေ ၉၆ အိမ် ရှိပြီး လူဦးရေ ၅၀၀ ကျော်ရှိပြီး ဂဠုံကုန်းကျေးရွာအုပ်စု တခုလုံးမှာတော့ အိမ်ခြေ ၅၀၀ ကျော် နဲ့ လူဦးရေ ၃၀၀၀ လောက် ရှိနေပါတယ်။
သတင်း-မောင်မောင်လင်း
