ကိုဗစ်-၁၉ လူနာအမှတ် ၂၉၂ ကျန်းမာရေးကောင်းမွန်၍ စစ်တွေဆေးရုံမှ ဆင်းခွင့်ပြု
DVB
·
July 13, 2020
ရခိုင်ပြည်နယ်၊ စစ်တွေမြို့ ပြည်သူ့ဆေးရုံရှိ ကိုဗစ်-၁၉ လူနာအမှတ် ၂၉၂ ရဲ့ ကျန်းမာရေး ကောင်းမွန်လာတဲ့အတွက် ဇူလိုင် ၁၃ ရက်ယနေ့ မနက်ပိုင်းက ဆေးရုံမှ ဆင်းခွင့်ပြုလိုက်တယ်လို့ စစ်တွေမြို့ ပြည်သူဆေးရုံအုပ်ကြီး ဒေါက်တာဇော်လွင်က ပြောပါတယ်။
" ဒီလူနာကတော့ Negative ၂ ခါပြပြီး တစ်ပတ်အကြာ စောင့်ကြည့်ပြီးတော့မှ ဆေးရုံက ဆင်းခွင့်ပြုလိုက်တာဖြစ်တယ်။ စစ်တွေဆေးရုံမှာ positive လူနာက ဒီတစ်ဦးတည်း ဆိုတော့ နောက်ထပ် လူနာမရှိတောပါဘူး။"
လူနာအမှတ် ၂၉၂ နဲ့ ထိတွေခဲ့သူအားလုံးကို ၂ ကြိမ် စစ်ဆေးရာမှာလည်း ရောဂါပိုးမတွေ့ဘူးလို့ ဒေါက်တာဇော်လွင်က ပြောပါတယ်။
"သူနဲ့ထိတွေ့ခဲ့သူ ၁၀၀ ရာခိုင်နှုန်းလောက်ကို စစ်ဆေးရာမှာလည်း အားလုံးက Negative ဖြစ်ပါတယ်။"
ကိုဗစ်-၁၉ ရောဂါပိုးတွေ့ရှိသူ လူနာအမှတ် ၂၉၂ ဟာ ဘင်္ဂလားဒေ့ရှိနိုင်ငံကို ကုန်သွယ်မှုကိစ္စသွားရောက်ခဲ့ပြီး ဇွန်လ ၁၅ ရက်နေ့က စစ်တွေမြို့ကို ပြန်ရောက်ရှိလာပြီး နေထိုင်မကောင်းတဲ့အတွက် မိသားစုထံမသွားဘဲ့ ကျန်းမာရေးဌာနကို အကြောင်းကြားပြီး ဇွန်လ ၂၁ ရက်နေ့မှာ Hotel Quarnatine နေထိုင်ခဲ့ပြီး ဓာတ်ခွဲစစ်ဆေးရာမှ ရောဂါပိုးတွေ့ရှိခဲ့တာပါ။
ရခိုင်ပြည်နယ်မှာ ကိုရိုနာဗိုင်းရပ်စ်ပိုးကူးစက်ခံရသူ ၁၄ ဦးရှိတဲ့အနက် ၈ ဦးမှာ ဆေးရုံက ဆင်းခွင့်ရပြီလို့ ပြည်နယ်ကျန်းမာရေးဌာနက သိရပါတယ်။
သတင်း - လင်းလက်
