ယူအေအီးနှင့် ဘာရိန်းတွင်ပိတ်မိနေသည့် မြန်မာနိုင်ငံသား ၁၄၃ ဦး ရန်ကုန်ပြန်ရောက်
DVB
·
June 25, 2020
အာရပ်စော်ဘွားများပြည်ထောင်စုနဲ့ ဘာရိန်းနိုင်ငံတို့မှာ အခက်အခဲကြုံတွေ့နေရတဲ့ မြန်မာနိုင်ငံသား ၁၄၃ ဦးကို ဇွန်လ ၂၅ ရက်က ကယ်ဆယ်ရေးလေယာဉ်နဲ့ မြန်မာနိုင်ငံသို့ ပြန်လည်ခေါ်ဆောင်ခဲ့တယ်လို့ နိုင်ငံခြားရေးဌာနက သတင်းထုတ်ပါတယ်။
အဆိုပါ မြန်မာနိုင်ငံသား ၁၄၃ ဦးကို ဒိုဟာအပြည်ပြည်ဆိုင်ရာလေဆိပ်မှတစ်ဆင့် မြန်မာအပြည်ပြည်ဆိုင်ရာလေကြောင်းလိုင်း (MAI) ကယ်ဆယ်ရေးလေယာဉ်နဲ့ ပြန်လည်ခေါ်ဆောင်ခဲ့တာဖြစ်ပြီး ဒီနေ့မနက် ရန်ကုန်လေဆိပ်ကို ပြန်လည်ရောက်ရှိလာပါတယ်။
ပြန်ရောက်လာသူတွေကို ကျန်းမာရေးစိစစ်ပြီး သတ်မှတ်နေရာတွေမှာ (၂၁) ရက်တာ အသွားအလာကန့်သတ်နေထိုင်ဖို့ Quarantine ထားရှိမှာ ဖြစ်ပါတယ်။
ကိုဗစ်-၁၉ ကပ်ဘေးကာလအတွင်း နိုင်ငံတကာခရီးသည်တင် လေယာဉ်များပျံသန်းမှု ယာယီရပ်ဆိုင်းထားတာကြောင့် ပြည်ပနိုင်ငံအသီးသီးမှာ ပိတ်မိနေတဲ့ မြန်မာနိုင်ငံသားတွေထဲက ၅၀၃၆ ဦးကို အစိုးရက ကယ်ဆယ်ရေးလေယာဉ်တွေ အထူးလေယာဉ်တွေနဲ့ မြန်မာနိုင်ငံသို့ ပြန်လည် ခေါ်ဆောင်ပေးခဲ့ပြီးဖြစ်ပါတယ်။
ဓာတ်ပုံ- MOFA
