လုံးခင်းဒေသ၌ ရေတွင်းထဲ အမှိုက်ဆင်းဆယ်သူ ၃ ဦး အောက်စီဂျင်ပြတ် သေဆုံး
DVB
·
June 12, 2020
ကချင်ပြည်နယ်၊ ဖားကန့်မြို့နယ်၊ လုံးခင်းဒေသ ဆိုင်းရာရွာနေ အိမ်ခြံဝင်းအတွင်း ဇွန် ၁၁ ရက် ည ၇ နာရီကျော်က ရေတွင်းထဲ အမှိုက်ဆင်းဆယ်သူ အမျိုးသား ၃ ဦးသေဆုံးခဲ့တယ်လို့ သိရပါတယ်။
အခင်းဖြစ်ရာကို လုံးခင်းရဲစခန်းမှတာဝန်ရှိသူတွေ ကျေးရွာတာဝန်ခံ သက်သေတွေနဲ့အတူ သွားရောက်ကြည့်ရှုစစ်ဆေးခဲ့ရာ ပဲခူးတိုင်းရေတာရှည်မြို့နေ မောင်ဆန်းအေး (၂၇ နှစ်)၊ ပလက်ဝချင်းပြည်နယ်နေ ဦးကျော်အောင် (၃၄ နှစ်)၊ ပလက်ဝ ချင်းပြည်နယ်နေ ဦးနေဝင်း (၃၅ နှစ်) တို့ ၃ ဦး သေဆုံးနေတာကို တွေ့ရတာပါ။
ဖြစ်ပွားပုံမှာ မောင်ဆန်းအေး ရေတွင်းအတွင်းအမှိုက်ဆင်းဆယ်စဉ် အသက်ရှူကြပ် ရေနစ်နေတဲ့အတွက် ဦးကျော်အောင်နဲ့ ဦးနေဝင်းက ဆင်းကယ်စဉ် ၃ ဦးစလုံး အောက်စီဂျင်ပြတ် သေဆုံးခဲ့တာလို့ သိရပါတယ်။
၃ ဦး သေဆုံးတာ ဓမ္မတာအတိုင်း သေဆုံးခြင်းဟုတ်မဟုတ် စုံစမ်းဖို့ သေမှုသေခင်းအမှတ် ၁၀/၂၀၂၀ နဲ့ လုံးခင်းတိုက်နယ်ဆေးရုံကို ပို့ဆောင်ထားတယ်လို့ သိရပါတယ်။
သတင်း - မုန်းမုန်းမင်း
