ဘူးသီးတောင်မြို့၌ Quarantine ဝင်နေသူ ၁၅ ဦးတွင် ကိုဗစ်-၁၉ ရောဂါပိုးမတွေ့
DVB
·
May 27, 2020
ရခိုင်ပြည်နယ်၊ ဘူးသီးတောင်မြို့မှာ Quarantine ဝင်ရောက်နေထိုင်စဉ် အသည်းရောဂါနဲ့ သေဆုံးသွားတဲ့ အသက် ၅ နှစ်အရွယ် ကလေးငယ်တစ်ဦးအပါအဝင် ဆေးရုံမှာ Quarantine ထားရှိသူ ၁ ဦး၊ Facility Quarantine ထားရှိသူ ၁၃ ဦးတို့ရဲ့ ကိုဗစ်-၁၉ ရောဂါ စစ်ဆေးချက်မှာ အားလုံး Negative ဖြစ်ကြောင်း ဘူးသီးတောင်မြို့နယ်ဆေးရုံအုပ်ကြီး ဒေါက်တာစောမင်းသိန်းက ပြောပါတယ်။
"သေဆုံးတဲ့ကလေးက အသည်းရောဂါနဲ့ ဘင်္ဂလားမှာ ဆေးသွားကုရာကပြန်လာပြီး ဘူးသီးတောင် နန်းရာကုန်း Quarantine Center မှာ Quarantine ဝင်ရောက်နေထိုင်နေသူ ဖြစ်တယ်။ ဒါကြောင့် သူနဲ့ သူဖခင် အပါအဝင် Facility Quarantine ထားရှိသူ ၁၃ ဦးရဲ့ နှာခေါင်း၊ အာခေါင်တို့ပတ်တွေကို မေလ ၂၃ ရက်နေ့မှာ ပြည်နယ်ကို အရောက်ပို့ပေးခဲ့တယ်။ ကံကောင်းစွာပဲ အားလုံး Negative ဖြစ်ကြောင်း လွန်ခဲ့တဲ့ တနင်္လာနေ့က e-mail နဲ့ အကြောင်းကြားလာပါတယ်။"လို့ပြောပါတယ်။
သေဆုံးသွားတဲ့ ကလေးငယ်မှာ ဘူးသီးတောင်မြို့နယ်၊ ကြက်မောက်တောင်ကျေးရွာမှ အသက် ၅ နှစ် အရွယ်ကလေးငယ်တဦးဖြစ်ပြီး အသည်းမကောင်းတဲ့အတွက် လွန်ခဲ့တဲ့ တလလောက်က ဘင်္ဂလားဒေ့ရှ်နိုင်ငံသို့သွားရောက် ဆေးကုသမှုခံယူခဲ့ပါတယ်။
မေလ ၁၉ ရက်နေ့မှာ ဘူးသီးတောင်မြို့ရှိ နန်းရာကုန်း Quarantine Center မှာ Quarantine ဝင်ရောက်နေထိုင်နေစဉ် မကျန်းမမာဖြစ်လာပြီး ဘူးသီးတောင်ပြည်သူဆေးရုံမှာ တက်ရောက်ဆေးကုသမှုခံယူရင်း သေဆုံးသွားခဲ့တာ ဖြစ်ပါတယ်။
သတင်း- လင်းလက်
