အင်္ဂပူမြို့နယ်တွင် Mask တပ်ဆင်ရန် လူထု အသိပညာပေး
DVB
·
May 20, 2020
ဧရာဝတီတိုင်းဒေသကြီး၊ အင်္ဂပူမြို့နယ်ရှိ ပျံကျစျေးတွေ၊ လမ်းဆုံလမ်းဂွတွေမှာ မြို့ခံပြည်သူတွေ အပြင်ထွက်ရင် နှာခေါင်းစည်း Mask တပ်ဆင်ဖို့အရေးကို ဌာနပေါင်းစုံနဲ့ ပြည်သူလူထုတွေ ပူပေါင်းလှုပ်ရှားအသိပညာပေး နေကြပါတယ်။
ဧရာဝတီတိုင်းဒေသကြီး အစိုးရကနေ အပြင်ထွက်ရင် Mask တပ်ဆင်ကြဖို့နဲ့ မတပ်ဆင်ပါက တဦးကို Mask သုံးခု ကျပ် ၃၀၀၀ ကျပ်နဲ့ဝယ်ယူခိုင်းဖို့ ညွှန်ကြားပြီးနောက်ပိုင်းမှာ တိုင်းအတွင်း က မြို့နယ်တွေမှာ Mask တပ်ဆင်ရေးလှုပ်ရှားမှုတွေ ကျယ်ကျယ်ပြန့်ပြန့်လုပ်ဆောင်နေကြတာပါ။
အင်္ဂပူမြို့နယ် ပြည်သူ့ဆေးရုံအုပ်ကြီး ဒေါက်တာဦးအောင်မြင့်စိုးကတော့ "အဓိက နှာခေါင်းစည်းတပ်ပြီး သွားလာဖို့ အသိပညာပေးနေတာပါ။ နောက်ပိုင်း ဒဏ်တပ်မဲ့ အစီအစဉ် ရှိပါတယ်။ COVID-19 ကာလအတွင်း ရောဂါဖြစ်ပွားမှု နည်းနိုင်သလောက် နည်းစေဖို့ လုပ်ဆောင်ရတာပါ။ ပြည်သူတွေအနေနဲ့လိုက်နာစေချင်တယ်လို့” ပြောပါတယ်။
အင်္ဂပူမြို့နယ် Mask လှုပ်ရှားမှုမှာ ပါဝင်တဲ့ ဒေါ်ဖြူဖြူကတော့ "ပြည်သူလူထုတွေ ပါဝင်ဖို့ တိုက်တွန်းပါတယ်။ အခုဆိုရင် ဧရာဝတီတိုင်းမှာ ရောဂါတွေ့ရှိသူ ရှိလာပြီဖြစ်လို့ အနေအထိုင်တွေ လည်း ဆင်ခြင်သင့်တယ်"လို့ ပြောပါတယ်။
