ကလေးမြို့က ကိုဗစ်လူနာအမျိုးသမီး ၁ ဦး ရောဂါသက်သာ၍ ဆေးရုံဆင်း
Aung Ko Latt
·
May 9, 2020
စစ်ကိုင်းတိုင်းအတွင်း ကိုဗစ်-၁၉ အတည်ပြုလူနာ စစ်ကိုင်းမြို့မှာ ၁ ဦး၊ ကလေးမြို့မှာ ၆ ဦး စုစုပေါင်း ၇ ဦးရှိပြီး ကလေးမြို့က လူနာအမျိုးသမီးတဦး ရောဂါသက်သာပျောက်ကင်းလို့ မေလ ၈ ရက်နေ့က ဆေးရုံကနေ ဆင်းခွင့်ပြုလိုက်ပြီဖြစ်ပါတယ်။
စစ်ကိုင်းတိုင်းအတွင်း ရောဂါပိုးတွေ့ရှိထားသူတွေထဲမှာ ပထမဆုံးဆေးရုံက ဆင်းခွင့်ရသူလည်း ဖြစ်ပါတယ်။
"လူနာအမှတ် Case -74 ရဲ့ ဓာတ်ခွဲနမူနာကို မေလ ၄ ရက်နေ့မှာ စစ်ဆေးခဲ့ရာ Negative တကြိမ်ပြခဲ့သလို မေ ၈ ရက်နေ့မှာလည်း Negative တကြိမ် ပြခဲ့တာကြောင့် COVID -19 ရောဂါပျောက်ကင်းပြီဖြစ်လို့ မေလ ၈ ရက်နေ့ ညနေပိုင်းမှ စတင်ကာ ဆေးရုံမှဆင်းခွင့်ပြုလိုက်ပြီ" လို့ စစ်ကိုင်းတိုင်းဒေသကြီး ကိုဗစ်ရောဂါ ထိန်းချုပ်ရေးနှင့် အရေးပေါ်တုန့်ပြန်ရေးကော်မတီရဲ့ လူမှုကွန်ရက်စာမျက်နှာမှာ ဖော်ပြထားပါတယ်။
ဒီကိစ္စနဲ့ပတ်သက်ပြီး စစ်ကိုင်းတိုင်းဒေသကြီး လူမှုရေးဝန်ကြီးနှင့် ပြောရေးဆိုခွင့်ရှိသူ လူ့စွမ်းအားအရင်းအမြစ်ဝန်ကြီးတို့ကို ဆက်သွယ်ရာမှာတော့ ဆက်သွယ်လို့ မရသေးပါဘူး။
ကလေးမြို့ဆေးရုံကြီးမှာ ကျန်ရှိတဲ့ လူနာ ၅ ဦးဟာ လူနာအမှတ် ၈၈ နဲ့ ထိတွေ့ဆက်စပ်ခဲ့တဲ့ တမိသားစုအတွင်းမှ လူနာတွေ ဖြစ်တယ်လို့လည်း သိရပါတယ်။
ကျန်းမာရေးနှင့် အကစားဝန်ကြီးဌာနက မေ ၉ ရက်နေ့ မနက်အထိ ထုတ်ပြန်ချက်အရ တနိုင်ငံလုံးမှာ ရောဂါပိုးတွေ့သူ ၁၇၇ ဦး၊ ပြန်လည်သက်သာလာသူပေါင်း ၆၇ ဦး၊ ဆေးရုံကဆင်းခွင့်ပြုသူ ၄၃ ဦး၊ သေဆုံးသူ ၆ ဦးရှိတယ်လို့ သိရပါတယ်။
