မကွေးမြို့တွင် ဝင်ငွေနည်း အိမ်ထောင်စု ၆၇၀ ကို အခြေခံစားသောက်ကုန်များလှူဒါန်း
DVB
·
May 7, 2020
မကွေးတိုင်းဒေသကြီး၊ မကွေးမြို့ပေါ်ရှိ ဝင်ငွေနည်း အိမ်ထောင်စုပေါင်း ၆၇၀ ကို ကုန်သည်/စက်မှုလုပ်ငန်းရှင်များအသင်းက မေလ ၆ ရက် မနက်မှာ အခြေခံစားသောက်ကုန်တွေ လှူဒါန်းပေးခဲ့ပါတယ်။
အောင်စေတနာ၊ အောင်မေတ္တာ၊ ကင်း၊ ကျောက်ကုန်း၊ အုတ်ဖို ရပ်ကွက်တွေထဲက ဝင်ငွေနည်း မိသားစု ၆၇၀ ကို အခြေခံ စားသောက်ကုန် ၈ မျိုး ထောက်ပံပေးတာဖြစ်ပြီး အိမ်ထောင်စုတစ်စုကို ကျပ် ၇၃၅၀ ဖိုးစီ စုစုပေါင်း ကျပ် ၄၉၅၂၄၀၀ ဖိုး ထောက်ပံ့ပေးတာဖြစ်ပါတယ်။
မကွေးမြို့ ကုန်သည်/စက်မှု လုပ်ငန်းရှင်များအသင်း ဥက္ကဋ္ဌ ဦးဖိုးနီက “COVID-19 ကာလမှာ ဝင်ငွေနည်းမိသားစုတွေ တဘက်တလမ်းက စားဝတ်နေရေး အဆင်ပြေအောင်ရည်ရွယ်ပြီး ထောက်ပံပေးခဲ့တာပါ။ နောက်ထပ်လည်း အလှူရှင်တွေနဲ့ ချိတ်ဆက်ပြီး ဆက်လက်ထောက်ပံ့ ပေးသွားမှာပါလို့" ဒီဗွီဘီကို ပြောပါတယ်။
မကွေးမြို့ ကုန်သည်/စက်မှု လုပ်ငန်းရှင်များအသင်းအနေနဲ့ ပြီးခဲ့တဲ့ ဧပြီ ၂၉ ရက်နေ့ ကလည်း မြို့ပေါ် ၄ ရပ်ကွက်က ဝင်ငွေနည်း မိသားစု ၆၃၅ စုအတွက် အခြေခံ စားသောက်ကုန်တွေ ထောက်ပံ့ပေးခဲ့ပါတယ်။
မင်းထီး
