မြဝတီမြို့တွင် လောင်းကစားဂိမ်းဆိုင်ကို ဝင်ရောက်ဖမ်းဆီး
DVB
·
May 6, 2020
ကရင်ပြည်နယ်၊ မြဝတီမြို့မှာ လောင်းကစားပြုလုပ်နေတဲ့ ဂိမ်းဆိုင် တဆိုင်ကို အာဏာပိုင်တွေက မနေ့ညက ဝင်ရောက်စစ်ဆေးပြီး လောင်းကစားသူ ၁၀ ဦးလောက်ကို ရဲစခန်းမှာ ခေါ်ယူစစ်ဆေးနေပါတယ်။
ဒါ့အပြင် အဆိုပါ ဂိမ်းဆိုင်မှာရှိတဲ့ လောင်းကစားစက် ၆ လုံးကိုလည်း သိမ်းဆည်းလိုက်ပါတယ်။
မြဝတီမြို့ အမှတ်(၄)ရပ်ကွက်မှာလည်း မေလ ၅ ရက် ည ၁၁ နာရီလောက်က အချိန်မတော်လမ်းထွက်လာတဲ့ ကားတစီး လှည့်ကင်းနဲ့တွေ့လို့ မောင်းပြေးရာမှာ ပလက်ဖောင်းနဲ့ တိုက်မိပြီး ယာဉ်မောင်း အနည်းငယ်ဒဏ်ရာရရှိသွားတယ်။
မြန်မာ-ထိုင်းနယ်စပ် မြဝတီမြို့မှာ ဧပြီလ ၁၈ ရက်ကတည်းကစပြီး ည ၁၁ နာရီ နောက်ပိုင်း ညမထွက်ရ အမိန့် ထုတ်ပြန်ထားတာဖြစ်ပါတယ်။
မြဝတီမြို့ဟာ မြန်မာနိုင်ငံဒေသအသီးသီးက ရွှေ့ပြောင်း ပျံကျသူတွေလာရောက်နေထိုင်တာ များတဲ့အတွက် လောင်းကစားမှု၊ မူးယစ်ဆေးဝါးမှု၊ ခိုးမှုနဲ့ တခြားရာဇဝတ်မှုတွေ ဖြစ်ပွားလေ့ရှိလို့ ခုရက်ပိုင်းအတွင်း မြန်မာနိုင်ငံရဲတပ်ဖွဲ့နဲ့ နယ်မြေခံ လက်နက်ကိုင်အဖွဲ့တွေ ပူးပေါင်း ကင်းလှည့်နေတာဖြစ်ပါတယ်။
ဖိုးစီ
