ဒိုက်ဦးမြို့နယ်တွင် မူးယစ်ရမ်းကားနေသူ ၁ ဦးကို ရဲတပ်ဖွဲ့က ပစ်ခတ်ဖမ်းဆီး
DVB
·
April 13, 2020
ပဲခူးတိုင်း ဒိုက်ဦးမြို့နယ်မှာ မူးယစ်ရမ်းကားနေသူ ၁ ယောက်ကို ရဲတပ်ဖွဲ့က သတိပေး ပစ်ခတ်ဖမ်းဆီးခဲ့တယ်လို့ ပြည်ထဲရေးက ထုတ်ပြန်ပါတယ်။
၂၀၂၀ ပြည့်နှစ်၊ ဧပြီလ ၁၂ ရက်နေ့ ညနေ ၅ နာရီခွဲက ဒိုက်ဦးမြို့၊ ဒရယ်မီးရပ်ကွက်နေ မိုးမင်းထက် (၂၁-နှစ်)ဟာ အရက်သေစာ သောက်စားမူးယစ်ပြီး နေအိမ်ရှိပရိဘောဂပစ္စည်းတွေကို ရိုက်ချိုးဖျက်ဆီးနေကြောင်း သတင်းအရ ဒိုက်ဦးမြို့ ရဲတပ်ဖွဲ့ဝင်များ ပါဝင်တဲ့ ပူးပေါင်းအဖွဲ့က သွားရောက်ထိန်းသိမ်းခဲ့တယ်လို့ ဆိုပါတယ်။
မိုးမင်းထက်က ရဲတပ်ဖွဲ့ဝင်တွေကို ညစ်ညမ်းစွာ ဆဲဆိုပြီး “အကုန် သတ်ပစ်မယ်” လို့ ခြိမ်းခြောက်ပြောဆိုကာ ဓားနဲ့ခုတ်ဖို့ ပြေးဝင်လာတာကြောင့် ရဲတပ်ဖွဲ့ဝင်တဦးက ၁၂ ဗို့ ပြောင်းချောသေနတ်နဲ့ ၁ ချက် သတိပေးပစ်ခတ်ခဲ့ရာ ဒဏ်ရာ (မစိုးရိမ်) ရရှိခဲ့တယ်လို့ ထုတ်ပြန်ချက်မှာ ဖော်ပြပါတယ်။
မိုးမင်းထက်(ဖမ်းမိ)အား ဒိုက်ဦးမြို့မရဲစခန်းက ရာဇသတ်ကြီးပုဒ်မ ၃၅၃/၅၀၆/၂၉၄( တာဝန်ထမ်းဆောင်နေသော ပြည်သူ့ဝန်ထမ်းအား နှောင့်ယှက်မှု၊ ခြိမ်းခြောက်မှု၊ ဆဲဆိုမှု) နဲ့ အမှုဖွင့် စစ်ဆေးနေတယ်လို့ သိရပါတယ်။
Photo : Ministry of Home Affairs, Myanmar
