COVID-19 အတည်ပြုလူနာသစ် ၃ ဦး ထပ်မံတွေ့ရှိ
DVB
·
April 13, 2020
စောင့်ကြည့်လူနာတွေ၊ ဆေးရုံတွေနဲ့ သက်ဆိုင်ရာနေရာတွေမှာ အသွားအလာကန့်သတ်ပြီး စောင့်ကြပ်ကြည့်ရှုမှုခံနေသူ စုစုပေါင်း ၂၇၈ ဦးရဲ့ ဓာတ်ခွဲနမူနာတွေကို အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က စစ်ဆေးချက်အရ အတည်ပြု လူနာ ၃ ဦး ထပ်မံတွေ့ရှိခဲ့တယ်လို့ ကျန်မာရေးဌာနက ဒီနေ့မနက် ၀၀:၃၀ နာရီမှာ ထုတ်ပြန်ထားပါတယ်။
ကျန်လူနာတွေနဲ့ စောင့်ကြပ် ကြည့်ရှုမှုခံနေသူ ၂၇၅ ဦးရဲ့ ဓာတ်ခွဲအဖြေတွေအရ COVID-19 ရောဂါပိုး မရှိဘူးလို့ ဆိုပါတယ်။
ဓာတ်ခွဲအတည်ပြုလူနာသစ် (Case-39) ကတော့ ရန်ကုန်ပြည်သူ့ဆေးရုံကြီးမှာ စောင့်ကြည့်လူနာအဖြစ်ကုသမှုခံယူခဲ့သူ အသက် (၈၅) နှစ်အရွယ် အမျိုးသားတဦး ဖြစ်ပါတယ်။
ဓာတ်ခွဲအတည်ပြုလူနာသစ် (Case-040) ဟာ ဗဟန်းမြို့နယ်မှာ နေထိုင်တဲ့ အသက် ၆၈ နှစ်အရွယ် အမျိုးသမီးတဦးဖြစ်ပြီး အတည်ပြုလူနာ (Case-08) နဲ့ (Case-028) တို့နဲ့ အတူနေမိသားစုဝင်တွေ ဖြစ်ပါတယ်။
ဓာတ်ခွဲအတည်ပြုလူနာ (Case-041) ကတော့ အင်းစိန်မြို့နယ်မှာ နေထိုင်တဲ့ အသက် ၃၈ နှစ်အရွယ် အမျိုးသားတဦးဖြစ်ပြီး (၆-၄-၂၀၂၀) ရက်နေ့က စတင်ပြီး ဖျားတာ၊ ချောင်းဆိုးတာ၊ ကိုယ်လက်နာကျင်ကိုက်ခဲတာ၊ နုံးချည့်တာ စတဲ့ လက္ခဏာတွေ ခံစားခဲ့ရပေမဲ့ ရောဂါလက္ခဏာ ပြင်းထန်ခြင်း မရှိတာကြောင့် ဆေးရုံကို သွားရောက်မပြသခဲ့ဘူးလို့ ဆိုပါတယ်။
အဆိုပါလူနာဟာ (Case-024)၊ (Case-034)၊ (Case-035)၊ (Case-036)၊ (Case-037) တို့နဲ့ ဘာသာရေးအခမ်းအနား အတူတက်ရောက်ခဲ့ဖူးသည့် ရာဇဝင်ရှိတယ်လို့ သိရပါတယ်။ ဧပြီ ၁၂ ရက်နေ့က ချောင်းဆိုး ဖျားနာတာကြောင့် အင်းစိန်ပြည်သူ့ဆေးရုံကြီးမှာ သွားရောက်ပြသခဲ့ပြီး ဓာတ်ခွဲနမူနာ စစ်ဆေးခဲ့တာပါ။
မြန်မာနိုင်ငံမှာ ဧပြီ ၁၃ ရက်နေ့မနက်ပိုင်းအထိ COVID-19 ရောဂါ ဓာတ်ခွဲအတည်ပြုလူနာ စုစုပေါင်း ၄၁ ဦး တွေ့ရှိခဲ့ပြီး သေဆုံးသူ ၄ ဦးရှိသွားပြီ ဖြစ်ပါတယ်။
ဓာတ်ခွဲအတည်ပြုလူနာ တွေ့ရှိမှုမှာ ရန်ကုန်မြို့က အများဆုံးဖြစ်ပြီး ၂၉ ဦး၊ ချင်းပြည်နယ် ၃ ဦး၊ ရှမ်းပြည်နယ် ၂ ဦး၊ မွန်ပြည်နယ် ၁ ဦးတို့ဖြစ်ပြီး ၃၄ ဦးရဲ့ ကျန်းမာရေးအခြေအနေ တည်ငြိမ်နေပြီး ဝေဘာဂီအထူးကုဆေးရုံကြီးရှိ လူနာ ၁ ဦးကိုတော့ အထူးကြပ်မတ်ခန်းမှာ သီးခြားထားရှိ ဆေးကုသပေးနေတယ်လို့ ကျန်းမာရေးဌာနက ထုတ်ပြန်ထားပါတယ်။
