မွန်ပြည်နယ်တွင် စောင့်ကြည့်လူနာ သေဆုံးသူ ၁၀ ဦးထိ ရှိလာ
DVB
·
April 11, 2020
မွန်ပြည်နယ်မှာ မတ် ၂၀ ရက်နေ့ကနေ ဧပြီ ၁၀ ရက်အထိ စောင့်ကြည့်လူနာ သေဆုံးသူ ၁၀ ဦးအထိ ရှိလာပြီလို့ မွန်ပြည်နယ် ပြည်သူ့ကျန်းမာရေးဦးစီးဌာန ဒုတိယပြည်နယ် ပြည်သူ့ကျန်းမာရေးဦးစီးမှူး ဒေါက်တာဝတ်မှုံက အတည်ပြုပါတယ်။
သေဆုံးခဲ့တဲ့ စောင့်ကြည့်လူနာတွေထဲမှာ PUI လို့ သတ်မှတ်ထားတဲ့ စောင့်ကြည့်လူနာ ၇ ဦးနဲ့ Hospital Quarantine စောင့်ကြည့်လူနာ ၃ ဦး၊ စုစုပေါင်း ၁၀ ဦးအထိ ရှိလာခဲ့တာ ဖြစ်ပါတယ်။
သေဆုံးသူ အများစုဟာ နှလုံးရောဂါနဲ့ အဆုတ်တီဘီရောဂါ အခံရှိနေသူတွေ အများဆုံး ပါဝင်နေတယ်လို့ ဒေါက်တာ ဝတ်မှုံက ပြောပါတယ်။
သေဆုံးသူ ၈ ဦးကတော့ Covid 19 ရောဂါပိုး မတွေ့ထားသူတွေ ဖြစ်ပြီး ကျန် ၂ ဦးရဲ့ အဖြေကိုတော့ အမျိုးသားကျန်းမာရေးဓာတ်ခွဲမှုဆိုင်ရာဌာနကို ပို့ဆောင် စစ်ဆေးထားပါတယ်။
လက်ရှိမှာတော့ မွန်ပြည်နယ် ကိုရိုနာဗိုင်းရပ် COVID-19 ရောဂါ စောင့်ကြည့်လူနာ PUI ၂၃ ဦးနဲ့ Hospital Quarantine စောင့်ကြည့်လူနာ ၇၇ ဦး ရှိနေပြီး ၆၁ ဦးကတော့ ကျန်းမာရေး ကောင်းသွားလို့ ဆေးရုံက ဆင်းခွင့်ပြုထားပါတယ်။
ကျန်စောင့်ကြည့်လူနာ ၂၈ ဦးကိုတော့ ဆေးရုံမှာ ဆက်လက်စောင့်ကြည့်နေတာ ဖြစ်ပါတယ်။
နိုင်ငံတဝန်းမှာတော့ ဒီနေ့မနက်ပိုင်းအထိ COVID-19 အတည်ပြုလူနာ စုစုပေါင်း ၂၈ ဦး၊ သေဆုံးသူ ၃ ဦးနဲ့ ပြန်လည်သက်သာလာသူ ၂ ဦး ရှိနေပါတယ်။
