Homeမြန်မာသတင်း
ညောင်လေးပင်မြို့နယ်၌ ပြည်ပပြန် ၃၀၀ ကျော်ရှိ၊ သံသယလူနာ ၄ ဦး၏ မိသားစုကို စောင့်ကြည့်နေ
ညောင်လေးပင်မြို့နယ်၌ ပြည်ပပြန် ၃၀၀ ကျော်ရှိ၊ သံသယလူနာ ၄ ဦး၏ မိသားစုကို စောင့်ကြည့်နေ
DVB
·
March 26, 2020
ပဲခူးတိုင်းဒေသကြီး၊ ညောင်လေးပင်မြို့နယ်အတွင်း ပြည်ပမှာအလုပ်သွားလုပ်နေသူ ရွှေ့ပြောင်းလုပ်သား ၃၀၀ ကျော်ပြန်လည်ရောက်ရှိနေပြီး ကိုရိုနာဗိုင်းရပ်စ်စောင့်ကြည့်သံသယလူနာ ၄ ဦးရဲ့မိသားစုဝင်တွေကို နေအိမ်မှာ အသွားအလာကန့်သတ် စောင့်ကြည့်စစ်ဆေးနေတယ်လို့ မြို့နယ်အထွေထွေ အုပ်ချုပ်ရေးဦးစီးဌာနက ပြောပါတယ်။
မတ်လ ၂၄ ရက်က ပြည်ပကပြန်လာတဲ့ ရွှေ့ပြောင်းလုပ်သား ကျား ၁၀၅ ဦး၊ မ ၄၉ ဦး မတ်လ ၂၅ ရက်က ကျား ၁၀၀ ဦး ၊ မ ၅၆ ဦးတို့ ညောင်လေးပင်မြို့နယ်ကို ပြန်လည်ရောက်ရှိခဲ့တယ်လို့ ဆိုပါတယ်။
ပြည်ပကပြန်လာသူတွေကို နေအိမ်မှာ ၁၄ ရက် စောင့်ကြည့်စစ်ဆေးနေပြီး စံဖဲကျေးရွာရဲ့ မူလွန်ကျောင်းတခုကို စင်တာအဖြစ်အသုံးပြုကာ ပြည်ပကပြန်လာသူ ၆ ဦးကို အဲ့ဒီစင်တာမှာ ၁၄ ရက်စောင့်ကြည့်စစ်ဆေးနေတယ်လို့ ညောင်လေးပင်မြို့နယ် အုပ်ချုပ်ရေးမှူး ဦးနော်မိုင်လှကြည်က ဒီဗွီဘီ ကိုပြောပါတယ်။
"ခုအချိန်ထိတော့ နောက်ထက် ကိုရိုနာဗိုင်းရပ်စ် သံသယလူနာတော့ ထပ်မတွေ့သေးဘူး၊ ပြည်သူတွေအနေနဲ့လည်းကျန်းမာရေးဦးစီးဌာနကညွှန်ကြားချက်အတိုင်း လိုက်နာဆောင်ရွက်ကြပါ။ ပြည်ပက ပြန်လာသူတွေရှိပါကလည်း အုပ်ချုပ်ရေးမှူးတွေ၊ ကျန်းမာရေးမှူးတွေကို အသိပေး အကြောင်းကြားပေးကြပါ။"
ညောင်လေးပင်မြို့နယ်မှာ မတ်လ ၂၄ရက်နဲ့ ၂၅ ရက်က တွေ့ရှိခဲ့တဲ့ ကိုရိုနာဗိုင်းရပ်စ်စောင့်ကြည့်သံသယရှိသူ ၄ ဦးရဲ့ မိသားစုဝင်တွေကို ရပ်ကျေးအုပ်ချုပ်ရေးမှူးတွေနဲ့ ကျေးရွာကျန်းမာရေးမှူးတွေက တနေ့ကို နှစ်ကြိမ် စောင့်ကြည့်စစ်ဆေးပေးနေသလို သူတို့ရဲ့ မိသားစုဝင်တွေရဲ့စားဝတ်နေရေးကိုလည်း ကူညီဆောင်ရွက်ပေးနေတယ်လို့ သိရပါတယ်။
သတင်း၊ဓါတ်ပုံ - နေလင်းထိုက်
