ရမ်းဗြဲတွင် မိုင်းပေါက်ကွဲမှုဖြစ်၊ ဒေသခံအမျိုးသမီး ၂ ဦး ဖမ်းဆီးခေါ်ဆောင်ခံရ
DVB
·
March 2, 2020
ရခိုင်ပြည်နယ်၊ ရမ်းဗြဲမြို့ စစ်ပြားကျေးရွာနဲ့ ရမ်းသစ်ချေကျေးရွာကြားမှာ မတ် ၂ ရက်နေ့က တပ်မတော် စစ်ကြောင်းဖြတ်သွားပြီးနောက် ခဏအကြာ ပေါက်ကွဲမှုဖြစ်ပေါ်ခဲ့ပြီး ရမ်းသစ်ချေကျေးရွာက အမျိုးသမီး ၂ ဦးကို တပ်မတော်က ဖမ်းဆီးခေါ်ဆောင်သွားတယ်လို့ ကျေးရွာ ဒေသခံတွေက ပြောပါတယ်။
စစ်ပြားကျေးရွာနေဒေသခံတဦးက “စစ်တပ်ကရွာ ၂ ရွာမှာ အဖွဲ့ခွဲပြီး အိပ်ခဲ့ကြတယ်၊ တဖွဲ့ကတော့ မနက် ၇ နာရီလောက်မှာ ထွက်သွားကြတယ်၊ နောက်တဖွဲ့ကတော့ ၈ နာရီခွဲလောက်မှာ ထွက်သွားတယ်ပေါ့။ သူတို့ ရွာထဲဝင်ပြီး သွားကြတာပေါ့၊ သူတို့သွားပြီး သိပ်မကြာဘူး စစ်ပြားရွာနဲ့ ရမ်းသစ်ချေရွာကြားမှာ ပေါက်ကွဲမှုဖြစ်တယ်။ ဘာတိုက်ပွဲမှ မဖြစ်ဘူးပေါ့။ အဲဒီပေါက်ကွဲမှုဖြစ်ပြီးတော့ သိပ်မကြာဘူး၊ အဲဒီအနားမှာ ထင်းခွေနေတဲ့ အမျိုးသမီး ၂ ယောက်ကို ခေါ်သွားတယ်” လို့ ပြောပါတယ်။
အဲဒီလို ဖမ်းဆီးသွားတဲ့အတွက် ကျေးရွာတာဝန်ရှိသူတွေက ထောက်ခံစာနဲ့ သွားရောက်ဖြေရှင်းခဲ့ပေမယ့် မရဘဲ စစ်ဆေးဖို့အတွက် ခေါ်ဆောင်သွားတယ်လို့ ရမ်းသစ်ချေကျေးရွာနေ အမည်မဖော်လိုသူတဦးက ပြောပါတယ်။
“ရမ်းသစ်ချေကျေးရွာနဲ့ စစ်ပြားကျေးရွာကြားမှာ လက်နက်ကြီးပစ်သံလည်း တခေါက် နှစ်ခေါက်လောက် ကြားလိုက်ရတယ်၊ သေနတ်ပစ်သံတွေလည်း ကြားရတယ်၊ တိုက်ပွဲဖြစ်တာတော့ မဟုတ်လောက်ဘူး။ အဲဒီနားမှာ ထင်းခွဲနေတဲ့ အမျိုးသမီး ၂ ဦးပေါ့၊ သူတို့နယ်မြေရှင်းလင်းရေးလုပ်နေတဲ့အချိန် ဖြစ်လို့လားတော့မသိဘူး၊ ထိန်းသိမ်းထားတယ်လို့တော့ သိရတယ်။ ရွာလူကြီးနဲ့ ဒီကလူတွေ ထောက်ခံစာယူပြီးသွားတာတောင်မရဘူး၊ မြို့ကို စစ်ဆေးဖို့ ခေါ်သွားမယ်လို့တော့ သိရတယ်။”
အဆိုပါဖြစ်စဉ်နဲ့ပတ်သက်ပြီး ရမ်းဗြဲမြို့နယ် အုပ်ချုပ်ရေးမှူးကို ဆက်သွယ်မေးမြန်းရာမှာ ခရီးသွားနေတဲ့အတွက် ဖြစ်စဉ်အသေးစိတ်ကို မသိရှိဘဲ မိုင်းပေါက်ကွဲမှုလို့တော့ ကြားသိကြောင်း ပြန်လည်ဖြေကြားခဲ့ပါတယ်။
အနောက်ပိုင်းတိုင်းစစ်ဌာနချုပ်က ဗိုလ်မှူးကြီး ဝင်းဇော်ဦးနဲ့ တပ်မတော်သတင်းမှန်ပြန်ကြားရေးအဖွဲ့မှ ဗိုလ်မှူးချုပ် ဇော်မင်းထွန်းတို့ကို ဆက်သွယ်မေးမြန်းခဲ့ပေမယ့် ဆက်သွယ်လို့မရခဲ့ပါဘူး။
