ကလေးမြို့ဆေးရုံတာဝန်ရှိသူများကို ကျောင်းသားများ ဆန္ဒပြ
DVB
·
February 10, 2020
ကလေးမြို့မှာ နည်းပညာတက္ကသိုလ် ကျောင်းသား တာန်ဒါလ်မွန်းမာန် သေဆုံးသွားတာနဲ့ ပတ်သက်ပြီး ကလေးမြို့ဆေးရုံတာဝန်ရှိသူတွေကို ကလေးတက္ကသိုလ်ပေါင်းစုံ ကျောင်းသား ၂၀၀၀ လောက်က ဒီနေ့မနက် ဆန္ဒပြကြပါတယ်။
ကလေးနည်းပညာတက္ကသိုလ် စက်မှုစွမ်းအင် ပဉ္စမနှစ်ကျောင်းသား တာန်ဒါလ်မွန်းမာန်ဟာ ဆိုင်ကယ်မတော်တဆဖြစ်ပြီး ဦးခေါင်းထိခိုက်ဒဏ်ရာနဲ့ အရေးပေါ်လူနာအဖြစ် ကလေးမြို့၊ အထွေထွေရောဂါကုဆေးရုံကြီးမှာ ရောက်ရှိလာပြီး ၂၀၂၀ ဇန်နဝါရီ ၂၇ ရက်က ရုတ်တရက်ကွယ်လွန်သွားခဲ့တာပါ။
လူနာရဲ့ ရောဂါအခြေအနေ စိုးရိမ်ရတာကို သိပါလျက်နဲ့ သမားတို့ ခံယူကျင့်သုံးရမယ့် ကျင့်ဝတ်နဲ့ လူသားချင်းစာနာထောက်ထားမှု ကင်းမဲ့စွာနဲ့ တာဝန်ခံအာမခံမယ့် လူနာရှင် မရှိဆိုတဲ့ အကြောင်းပြချက်နဲ့ ဆေးရုံတာဝန်ရှိသူတို့က တစ်ညလုံးပစ်ပယ်ထားမှုကြောင့် ကျောင်းသား တာန်ဒါလ်မွန်းမာန် သေဆုံးခဲ့တာလို့ ကလေးတက္ကသိုလ်ကျောင်းသားသမဂ္ဂ က ပြောပါတယ်။
ဆန္ဒပြကျောင်းသားတွေဟာ ကလေးမြို့ ဆိပ်ကမ်းသာလမ်းကနေ ပင်လုံလမ်းနဲ့ ဗိုလ်ချုပ်လမ်းတွေကို လှည့်လည်ပြီး ပြည်သူ့ဆေးရုံတိုင်း လူနာတွေကို ပြည့်ဝစွာ ကုသခွင့် ရရှိရေး၊ အကျင့်ပျက်ဝန်ထမ်းတွေကို ထိထိရောက်ရောက်အရေးယူပေးရေး၊ ပြည်သူ့ဆေးရုံတွေမှာ အရေးပေါ် အသက်ကယ်ဘတ်ဂျက် လုံလောက်စွာ ထားရှိရေး။ ကျန်းမာရေးဘက်ဂျက်ကို အစိုးရ အထွေထွေ အသုံးစရိတ်ရဲ့ အနည်းဆုံး ၁၀ ရာခိုင်နှုန်းထားရှိရေးဆိုတဲ့ အချက် ၄ ချက်ကို တောင်းဆိုထားပါတယ်။
တစ်ပတ်အတွင်း သက်ဆိုင်ရာ ဝန်ထမ်းတွေကို အရေးမယူပါက ဆက်ပြီးတုံ့ပြန် လုပ်ဆောင်သွားမယ်လို့လည်း ကလေးတက္ကသိုလ်ကျောင်းသားသမဂ္ဂက ပြောပါတယ်။
သတင်း- မင်းရဲစစ်နိုင်
