Homeမေးမြန်းခန်း
“ပွင့်ပွင့်လင်းလင်းပြောရရင် ကျနော့်မှာ အာလူးအကြီးကြီး တလုံးကျန်တယ်”... ဝူဟန်ရောက် မြန်မာကျောင်းသားနှင့် မေးမြန်းချက်
“ပွင့်ပွင့်လင်းလင်းပြောရရင် ကျနော့်မှာ အာလူးအကြီးကြီး တလုံးကျန်တယ်”... ဝူဟန်ရောက် မြန်မာကျောင်းသားနှင့် မေးမြန်းချက်
pyi sone
·
January 30, 2020
ကိုရိုနာဗိုင်းရပ်စ် ပျံ့နှံ့ဖြစ်ပွားနေတဲ့ တရုတ်နိုင်ငံ၊ ဟူဘေးပြည်နယ်၊ ဝူဟန်မြို့မှာ ပိတ်မိနေတဲ့ မြန်မာကျောင်းသားတွေကို အစိုးရက အထူးလေယာဉ်နဲ့ မြန်မာနိုင်ငံကို ပြန်ခေါ်ဖို့ စီစဉ်နေပါတယ်။ လက်ရှိ မြန်မာကျောင်းသားတွေရဲ့ နောက်ဆုံးအခြေအနေနဲ့ပတ်သက်ပြီး ဝူဟန်နည်း ပညာတက္ကသိုလ်မှာ Environmental Engineering & Science ဘာသာသင်ယူနေတဲ့ မြန်မာကျောင်းသား ကိုစည်သူထွန်းကို ဒီဗွီဘီက ဆက်သွယ်မေးမြန်းထားပါတယ်။
မေး။ ဝူဟန်မြို့မှာ ဒီနေ့ နောက်ဆုံးအခြေအနေ ဘယ်လိုရှိလဲ။
“ မြို့အခြေအနေကတော့ အရင်ရက်တွေအတိုင်းပဲ သူတို့ ပိတ်ထားဆဲပေါ့နော်။ လမ်းပေါ်မှာ ကားတွေလည်းသွားတာမျိုးမရှိသေးဘူး။ လူတွေလည်း သွားတာမျိုးမရှိသေးဘူး။ ကျောင်းသားတွေအခြေအနေကတော့ ကျောင်းသားတွေအကုန်လုံး ကျန်းမာရေးကောင်းသေးတယ်။ ဖျားတာနာတာလည်း အခုချိန် တယောက်မှမရှိသေးဘူး။ အဆင်ပြေပြေပါပဲ ကျန်းမာရေးနဲ့ပတ်သက်ပြီးတော့။ ”
မေး။ မြို့ကို ပိတ်ထားတဲ့အခြေအနေမှာ ကျောင်းမှာ အစားအစာ ဘယ်လိုအခက်အခဲမျိုးတွေရှိသလဲ။
“ကျနော်တို့ အခုက လူ ၆၀ ကို တကျောင်းထဲမှာ စုနေတာမျိုးမဟုတ်ဘူး။ ဒီမြို့ရဲ့ နေရာအနှံ့မှာ ရှိတဲ့ကျောင်းတွေမှာ ရှိနေတာပေါ့နော်။ ဆိုတော့ တော်တော်များများသော ကျောင်းတွေမှာ Canteen တွေမဖွင့်ဘူး။ စူပါမတ်ကတ်တွေလည်း ကျနော်တို့ ထွက်ဝယ်လို့ အဆင်မပြေဘူး။ မပြေရတဲ့အကြောင်းအရင်းက ကျနော်တို့ တကယ်လို့ ကျောင်းထဲက ဆူပါမတ်ကတ်တွေ ဖွင့်မယ်ဆိုလို့ ရှိရင် တရုတ်တွေရောက်လာတာပေါ့နော်။ ရောက်လာတယ်ဆိုတာက သူတို့ သတင်းကြားပြီးတော့ ကားတွေနဲ့ရောက်လာပြီး ဝယ်ကြတယ်။ အဲတော့ ရောဂါကူးစက်ခံရမှာ ကြောက်တဲ့အတွက် ကျနော်တို့ အဲဒီဆူပါမတ်ကတ်တွေကို ထွက်ဝယ်လို့ အဆင်မပြေဘူး။ ဒါအပမယ့် တချို့ Canteen တခု နှစ်ခုနဲ့ နည်းနည်းမြို့စွန်ဘက်ရောက်တဲ့ ကျောင်းတွေမှာကတော့ Canteen တွေပြန်ဖွင့်ပေးတယ်။ ဆူပါမတ်ကတ်တွေလည်း ဝယ်လို့ရနိုင်သေးတဲ့အခြေအနေတွေရှိတယ်။ အဲဒါကလည်း တကျောင်း နှစ်ကျောင်းပဲ။ အကုန်လုံးမဟုတ်ဘူး။ တော်တော်များများသော ကျောင်းတွေကတော့ အဆင်မပြေကြသေးဘူးဗျာ။ ကျနော့်ကျောင်းက မြို့လယ်ခေါင်တည့်တည့်ကြီးရောက်နေတာပေါ့ နော်။ မြို့လယ်ခေါင်တည့်တည့်မှာဖြစ်တဲ့အတွက် ကျနော်ကတော့ လုံးဝကို အဆင်မပြေတာ။ ကျနော့်ကျောင်းက လူတွေအကုန်လုံးရော၊ အခုဟာက နောက်ဆုံးအခြေအနေကို ပွင့်ပွင့်လင်းလင်းပြောရရင် ကျနော့်မှာ အာလူးအကြီးကြီး တလုံးကျန်တယ်။ ပြီးတော့ ခေါက်ဆွဲခြောက် ၃ ထုပ်လောက်ကျန်တယ်။ အရင်ရက်တွေက ဆန်ရှိနေတဲ့အတွက် ထမင်းကို ဦးစားပေးပြီး စားနေတာပေါ့။ ကျနော့်မှာ ဆန်လည်းကျန်သေးတယ်ဗျာ။ လောလောဆယ်က ဘာမှ ထပ်ဝယ်လို့ ရခြင်းမရှိသေးပါဘူး။ ”
မေး။ ဝူဟန်မှာရှိနေတဲ့ မြန်မာကျောင်းသူကျောင်းသားတွေ အထူးသဖြင့် မိန်းကလေးတွေ ဒီလိုအခြေအနေမှာ စိတ်ဓာတ်ရေးရာ ဘယ်လိုရှိနေပါသလဲ။
“ တော်တော်များများတော့ စိတ်ဓာတ်အတက်အကျတော့ ရှိတယ်ဗျာ။ အတက်အကျဆိုတာ က ကျနော်တို့ ဒီဘက်က ထုတ်ပြန်တဲ့စာတွေအပေါ်ပေါ့နော်။ အဲဒီအပေါ်မူတည်တာပေါ့။ အရင်ရက်တွေကဆိုလို့ရှိရင် တရုတ်အစိုးရနဲ့ညှိတော့ အဆင်မပြေတာရှိတယ်။ အဲဒီအတောအတွင်းမှာ စိတ်ဓာတ်ကျသွားတာမျိုးတွေရှိတယ်။ အခုဆိုရင်တော့ တော်တော်များများကတော့ မျှော်လင့်ချက်တွေနဲ့ဖြစ်လာပါပြီ။ ဒီပြန်ရတော့မယ်ဆိုတဲ့ သတင်းတခုကို ကျနော်တို့ ရတာပေါ့နော်။ အခုလောလောဆယ်တော့ သူတို့ ကျန်းမာအောင်နေဖို့နဲ့ အဲဒီအတွက်ပဲအာရုံစိုက်နေကြပါတယ်။ စိတ်ဓာတ်တွေ အရမ်းကြီးကျနေ တာတော့ မရှိပါဘူး။ ”
မေး။ အခု ဝူဟန်က မြန်မာကျောင်းသားတွေကို အထူးလေယာဉ်နဲ့ ပြန်ခေါ်မယ်လို့ နိုင်ငံခြားရေးဝန်ကြီးဌာနက ထုတ်ပြန်လာတယ်၊ ဒီအပေါ် ဘယ်လိုခံစားရသလဲ။
“ဝမ်းသာမိပါတယ်။ ကျနော်တို့ အကြွေးတခုဖြစ်တယ်ပေါ့နော်။ ဒီသံရုံးကော၊ နိုင်ငံခြားရေးဝန်ကြီးဌာနဘက်ကရော သူတို့အလုပ်လုပ်တယ်ပေါ့နော်။ တော်တော်လေးဝမ်းသာပါတယ်။ ကျနော်တို့ကို ပြန်ခေါ်မယ်ဆိုတဲ့အတွက် အရမ်းပျော်တာပေါ့။ ဘာလို့လဲဆိုတော့ ဒီဟာကြီးက ကျနော်တို့က လုံးဝအန္တရာယ်ရှိနေတဲ့ အခြေအနေကြီးပေါ့နော်။ ဒီလိုအခြေအနေမျိုးကနေပြီးတော့ ကျနော်တို့ မိသားစုတွေနဲ့ ပြန်တွေ့ရမယ်။ ပြီးတော့ ဒီကိုယ့်မွေးဖွားရာ နိုင်ငံကို ပြန်ရမယ်ဆိုတော့ တကယ်ကြီးကို လှိုက်လှိုက်လှဲလှဲ ဝမ်းသားပါတယ်။ ”
မေး။ မြန်မာကျောင်းသားတွေကို ၃ ရက်အတွင်းပြန်ခေါ်မယ်လို့ နိုင်ငံခြားရေးဌာန ဒုတိယအတွင်းဝန်က ပြောလာတယ်၊ ဒီအပေါ်ဘယ်လိုမြင်သလဲ။
“ကျနော်ထင်တာကတော့ ကျနော်တို့ကိုစပြီးတော့ ပိတ်တာက ၂၁ ရက်နေ့ဆိုတော့ ဒီနေ့ဆိုရင်တော့ ၁၁ ရက်မြောက်သွားပြီ။ နောက် ၃ ရက်ဆိုရင်တော့ ၁၄ ရက်ပြည့်သွားပြီပေါ့နော်။ အဲတော့ WHO ကချမှတ်ထားတဲ့ quarantine (ရောဂါမကူးစက်စေရန်ခွဲထားသည့်အချိန်ကာလ) လုပ်တဲ့အချိန်က ၁၄ ရက်ပြည့်သွားပြီ။ ၁၄ ရက်အတွင်းမှာလည်း ကျနော်တို့ ကျောင်းသားတွေအကုန်လုံးက ဖျားနာတာမရှိတဲ့အတွက် ၁၄ ရက်လောက်မှာ ကျနော်တို့ကို ပြန်ခေါ်မယ်ဆိုရင်တော့ safe ဖြစ်တဲ့အခြေအနေတခုပေါ့နော်။ ပြီးတော့ မြန်မာပြည်ရောက်ရင်လည်း ကျနော်တို့ကို သတ်သတ်ထားဦးမှာပါ။ ထားပြီးရင်သေချာအောင် safe ဖြစ်အောင် လုပ်ဦးမှာပါ။ ”
မေး။ မြန်မာပြည်ကိုပြန်ရောက်ရင် ၂ပတ်လောက် ဆေးရုံမှာ ကျန်းမာရေးစစ်ဆေး စောင့်ရှောက်မှုတွေ အရင်လုပ်ဦးမယ်ဆိုတော့ ဒီအပေါ် ဘယ်လိုခံစားမိသလဲ။
“လက်မခံနိုင်စရာတော့မရှိပါဘူး။ ဒါက လုပ်သင့်လုပ်ထိုက်တဲ့ အခြေအနေတခုပေါ့နော်။ ဒီလိုလုပ်တာက အစိုးရဘက်လည်း သူတို့ဒီ လုပ်ဆောင်ရမယ့်ကိစ္စတခုဖြစ်တယ်။ ပြီးတော့ ကျနော်တို့အနေနဲ့လည်း စိတ်ပိုပြီးတော့ ရှင်းတာပေါ့နော်။ အခုလောလောဆယ်မှာလည်း ဆိုရှယ်မီဒီယာတွေမှာက ပြောဆိုကြတယ်ဆိုတော့ ဒီမှာလည်း ကျနော်တို့က ၁၄ ရက် safe ဖြစ်လာပြီးပါပြီ။ တကယ်လို့ပြန်ခေါ်မယ်ဆိုရင်ပေါ့နော်။ ဟိုမှာလည်း နောက်ထပ် ၁၄ ရက် safe ပြီးတော့မှာ အိမ်ပြန်ခွင့်ပြုမယ်ဆိုတာက ဒါကျောင်းတဲ့အခြေအနေပေါ့နော်။ ဒါပေမယ့် ဟိုလိုမျိုး စိတ်ပူမိတာတခုကတော့ ကျနော်တို့ကို လူအများကြီးနဲ့တွဲထားမှာတခုပဲ ကျနော်တို့ စိတ်ပူမိတာပေါ့နော်။ ကျန်တာကတော့ လက်ခံနိုင်ပါတယ်။ ဒီလိုမျိုး ကျနော်တို့ကိုပြန်ခေါ်ဖို့ စီစဉ်ပေးတဲ့အတွက် သက်ဆိုင်ရာလူကြီးတွေအကုန်လုံးကိုပေါ့နော်၊ ပြီးတော့ ဆုတောင်းပေးနေတဲ့ မြန်မာနိုင်ငံသားအားလုံးကိုလည်း ကျေးဇူးတင်ပါတယ်လို့ အခုကတည်းက ကြိုပြောထားချင်ပါ တယ်။ ”
ကိုရိုနာ ဗိုင်းရပ်စ် သတင်းများ အချိန်နှင့်တပြေးညီ စုစည်းတင်ဆက်မှု
Live Updates: ==> http://burmese.dvb.no/archives/368575
