ကျောက်တော်တွင် ညမထွက်ရအမိန့် ဖောက်ဖျက်သူ ၂ ဦး ဖမ်းဆီးခံရ
DVB
·
April 21, 2019
ရခိုင်ပြည်နယ် ကျောက်တော်မြို့မှာ ညမထွက်ရအမိန့် ၁၄၄ အား ကျူးလွန်ဖောက်ဖျက်တဲ့ အမျိုးသား ၂ ဦးကို ဖမ်းဆီးအမှုဖွင့်ထားတယ်လို့ ကျောက်တော်မြို့မ ရဲစခန်း တာဝန်ရှိသူတဦးက ပြောပါတယ်။
"ဧပြီ ၂၀ ရက်နေ့ ည ၁၀ နာရီကျော်အချိန်မှာ သူတို့ကို အပြင်မှာတွေ့လို့ ပုဒ်မ ၁၄၄ ကို ကျူးလွန်ဖောက်ဖျက်တဲ့အတွက် မြို့နယ်အုပ်ချုပ်ရေးမှူးက တရားလိုပြုကာ ပုဒ်မ ၁၈၈ နဲ့ အမှုဖွင့်ထားပါတယ်" လို့ ပြောပါတယ်။
ဖမ်းဆီးခံရသူတွေကတော့ ကျောက်တော်မြို့ မြို့သစ်ရပ်ကွက်နေ ဦးထွန်းနိုင် နဲ့ ကိုသန်းကျော်မောင်တို့ဖြစ်တယ်လို့ သိရပါတယ်။
ကျောက်တော်မြို့မှာ အခုဖမ်းဆီးမှုဟာ ဧပြီလအတွင်း ဒုတိယမြောက်ဖြစ်ပြီး ပထမအကြိမ်တုန်းကလည်း ၂ ဦး ဖမ်းဆီး အမှုဖွင့်ခံထားရပါတယ်။
ရခိုင်ပြည်နယ် ရသေ့တောင်၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား စမြို့နယ် ၅ ခုမှာ ညမထွက်အမိန့်ကို ဧပြီ ၁ ရက်နေ့ကစပြီး ၂ လတာ ထုတ်ပြန်ထားတာပါ။
ညမထွက်ရအမိန့် ၁၄၄ အရ ည ၉ နာရီကနေ နောက်တနေ့မနက် ၅ နာရီအထိ ဖြစ်ကြောင်း ဖော်ပြထားပါတယ်။
ရခိုင်ပြည်နယ်အတွင်း ရဲကင်းတွေ အတိုက်ခိုက်ခံရတာ၊ တပ်မတော်နဲ့ အေအေတို့ တိုက်ပွဲတွေ ဖြစ်နေတာကြောင့် ဒေသတည်ငြိမ်ရေးနဲ့ တရားဥပဒေစိုးမိုးရေးအတွက် ညမထွက်ရအမိန့် ထုတ်ပြန်ထားတာလည်း ဖြစ်ပါတယ်။
