ကလေးလုပ်သား ၀.၄ သန်း အန္တရာယ်ရှိ လုပ်ငန်းများတွင် လုပ်ကိုင်နေရ
ရန်နိုင်ဇော်ဝင်း
·
January 11, 2019
မြန်မာနိုင်ငံမှာ ကလေးဦးရေ ၁၂ သန်းကျော်ရှိမှာ ၀.၆ သန်းဟာ ကလေးလုပ်သားတွေဖြစ်ပြီး ၀.၄ သန်းဟာ အန္တရာယ်ရှိတဲ့ လုပ်ငန်းတွေမှာ အလုပ်လုပ်နေကြတယ်လို့ အလုပ်သမား လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာနရဲ့ ၂၀၁၈ ခုနှစ် လုပ်သားအင်အားစစ်တမ်းမှာ ဖော်ပြထားပါတယ်။
ကလေးဦးရေရဲ့ ၃၀ ရာခိုင်နှုန်းကျော်ဟာ ကျေးလက်ကလေးလုပ်သားတွေဖြစ်ပြီး မြို့ပြကလေးဦးရေရဲ့ ၂၀ ရာခိုင်နှုန်းကျော်ဟာ မြို့ပြကလေး လုပ်သားတွေဖြစ်တဲ့ အတွက် မြို့ပြမှာနေတဲ့ ကလေးတွေထက် ကျေးလက်မှာ နေထိုင်တဲ့ကလေးတွေဟာ ကလေးလုပ်သားအဖြစ် လုပ်ကိုင်သူ ပိုများတယ်လို့ စစ်တမ်းမှာ ဖော်ပြထားပါတယ်။
ကလေးဦးရေ ၁၂ သန်းကျော်မှာ ၇၆ ရာခိုင်နှုန်းကျော်ဟာ ကျေးလက်ဒေသတွေမှာ နေထိုင်တဲ့ ကလေးတွေဖြစ်တယ်လို့လည်း ဖော်ပြထားပါတယ်။
ပြည်တွင်း ကလေးလုပ်သားဈေးကွက်မှာ အသက် ၁၅ နှစ်ကနေ ၁၇ နှစ်ကြား ကလေးတွေဟာ ကလေးလုပ်သားအဖြစ် အများဆုံး အလုပ်လုပ်ကိုင်နေကြတဲ့ အသက်အပိုင်အခြားတွေဖြစ်ပါတယ်။
ပညာရေးအရည်အချင်းမှာလည်း ကလေးလုပ်သား အများစုဟာ မူလတန်းအဆင့်သာ ပြီးမြောက်တယ်လို့ ၂၀၁၈ ခုနှစ် လုပ်သား အင်အားစစ်တမ်းမှာ ဖော်ပြထားပါတယ်။
