လွတ်လပ်ရေးနေ့ နယ်ခြားစောင့်ရဲစခန်း ၄ ခုကို အေအေ တပြိုင်နက် ဝင်တိုက်
DVB
·
January 4, 2019
ဒီကနေ့ လွတ်လပ်ရေးနေ့ မနက်ပိုင်းက ရခိုင်ပြည်နယ်၊ ဘူးသီးတောင်ရှိ နယ်ခြားစောင့် ရဲစခန်းတွေကို ရက္ခိုင့်တပ်မတော် (အေအေ) က တပြိုင်နက်တည်း ဝင်ရောက်တိုက်ခိုက်ခဲ့ပြီး နှစ်ဖက် ထိခိုက်ဒဏ်ရာရ သေဆုံးမှုတွေ ရှိခဲ့ပါတယ်။
ဘူးသီးတောင်မြို့နယ်၊ တောင်ပဇာကျေးရွာအုပ်စုရှိ ငမြင်းဘော်၊ ဂုတ်ပိ၊ ခထီးလှနဲ့ ကျောင်းတောင်ရွာ အခြေစိုက် နယ်ခြားစောင့်စခန်း ၄ ခုကို ဒီမနက် ၆ နာရီလောက်က တပြိုင်တည်း ဝင်ရောက်တိုက်ခိုက်ခဲ့တာလို့ ရက္ခိုင့်တပ်မတော် (အေအေ) ပြောခွင့်ရသူ ဦးခိုင်သုခက ဒီဗွီဘီကို ပြောပါတယ်။
“ဘူးသီးတောင်မြို့ရဲ့ မြောက်ဘက်မှာရှိတဲ့ အဲဒီနယ်ခြားစောင့်စခန်း လေးခုကို ကျနော်တုိ့ ရက္ခိုင့်တပ်မတော်က ဝင်ရောက်တိုက်ခိုက်တာ ရှိတယ်။ အဲဒီ နယ်ခြားစောင့်စခန်းတွေက ရဲစခန်းလို့ ပြောပေမယ့်လို့ အဲဒီ နယ်ခြားစောင့်ရဲ သက်သက်နေတဲ့ စခန်းတွေ မဟုတ်ဘူး။ မြန်မာ့တပ်မတော်ဘက်ကလည်း အဲဒီမှာ စခန်းချ ဝင်ထွက်သွားလာနေတဲ့ စခန်းတွေ။ ဆိုတော့ အဲဒီလို မြန်မာ့တပ်မတော်နဲ့ ရောနှောပြီးတော့ နေတဲ့စခန်းတွေ။”
ရက္ခိုင့်တပ်မတော်ဘက်က အခုလို ဝင်ရောက်တိုက်ခိုက်တဲ့အတွက် တပ်မတော်ကနေပြီးတော့ ဝေဟင်နဲ့ တောင်ကုန်းတွေပေါ်ကနေ လက်နက်ကြီးတွေနဲ့ ပစ်ခတ်ခဲ့တယ်လို့ ဦးခိုင်သုခက ပြောပါတယ်။
ဒီမနက်တိုက်ပွဲမှာ ရက္ခိုင့်တပ်မတော်ဘက်က ရဲဘော် ၂ ဦး သေဆုံးသွားပြီး အစိုးရတပ်ဖွဲ့တွေဘက်က အလောင်း ၇ လောင်းနဲ့ သုံ့ပန်း ၁၄ ယောက်ကို ဖမ်းဆီးထားကာ လက်နက်ခဲယမ်းတချို့ကိုလည်း သိမ်းဆည်းရမိခဲ့တယ်လို့ ဦးခိုင်သုခက ပြောပါတယ်။ နှစ်ဖက် ပစ်ခတ်တိုက်ခိုက်မှုကြောင့် အရပ်သား ထိခိုက်သေဆုံးမှု ရှိမရှိတော့ မသိရသေးပါဘူး။
တပ်မတော် ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေးညွှန်ကြားရေးမှူးရုံး ဒုညွန်ကြားရေးမှူး ဗိုလ်မှူးချုပ် ဇော်လင်းထွန်းကတော့ နယ်ခြားစောင့် ရဲစခန်းတွေ တိုက်ခိုက်ခံရတာ မှန်ကန်ကြောင်းနဲ့ အခုအခြေအနေတွေကို ထိန်းသိမ်းနိုင်ပြီလို့ ဒီဗွီဘီကို ပြောပါတယ်။
“ရွာက ဘူးသီးတောင်ရဲ့မြောက်ဘက် မောင်တောရဲ့အရှေ့မြောက်ဘက်မှာ ရှိတဲ့နေရာတွေပါဗျာ။ ထူးခြားတာက အဲဒီမှာရှိတဲ့ ရဲကင်းစခန်းတွေက နယ်စပ်ဒေသမျဉ်းပေါ်မှာ ရှိတဲ့ စခန်းတွေမဟုတ်ဘူး။ အကုန်လုံးက ခထီးလှစခန်းဆိုရင် ခထီးလှရွာဆိုရင် နယ်စပ်ဒေသ တိုင်းရင်းသားလူမျိုးများ အစီအစဉ်နဲ့ ဆောက်တဲ့ရွာပေါ့။ ဖွံ့ဖြိုးရေးလုပ်နေတဲ့ရွာပေါ့။ အဲဒီရွာမှာက အများအားဖြင့် တိုင်းရင်းသားတွေပဲ နေတဲ့ရွာဗျာ။ သူတို့ကို လုံခြုံမှုပေးဖို့အတွက် လုပ်ထားတဲ့ စခန်းတွေ ၀င်တိုက်ခံရတာ။ အကုန်လုံးက ရဲတွေ နေရာယူထားတဲ့နေရာ။ အခုလောလောဆယ် ကျနေ်ာပြောနိုင်တာက ၀င်ရောက်တိုက်ခံရတာမှန်တယ်။ လောလောဆယ် တပ်ကရော နယ်ခြားစောင့်ကရော အထောက်အကူပြုအဖွဲ့တွေ ရောက်သွားပြီ။ အခြေအနေ ထိန်းသိမ်းနိုင်ပြီ။”
နှစ်ဖက်တိုက်ပွဲတွေကြောင့် တပ်မတော်ဘက်က ထိခိုက်ကျဆုံးတာရှိသလို ပျောက်ဆုံးတာလည်း ရှိပေမယ့် စာရင်းအတိအကျ မသိရသေးဘူးလို့လည်း ဗိုလ်မှူးချုပ် ဇော်လင်းထွန်းက ပြောပါတယ်။
ဘူးသီးတောင်မြို့နယ်၊ ခထီးလှကျေးရွာအနီးမှာ တိုက်ပွဲဖြစ်ပွားတာနဲ့ ပတ်သက်ပြီး ခထီးလှ ကျေးရွာနားက ဇီးဒုံရွာသား ဦးဒုံမောင်က “တိုက်ပွဲဖြစ်တာက မနက် ၆ နာရီခွဲလောက်ကနေ ၁၀ နာရီလောက်အထိ လေယာဉ်နဲ့ ဗုံးနဲ့ချတယ်၊ လက်နက်နဲ့ပစ်တယ်၊ အခုက ငြိမ်သွားတယ်။ အမြောက်တွေနဲ့တိုက်တယ်။ လေယာဉ်နဲ့က ရွာအနီးကို ဗုံးကျဲတဲ့ လက်နက်နဲ့ပစ်တယ်။ ကျနော်တို့ရွာမှာတော့ ဘာမှမရှိဘူး ခထီးလှရွာနဲ့တော့ အဆက်အသွယ်မရသေးဘူး” လို့ ပြောပါတယ်။
ခထီးလှကျေးရွာမှာ အိမ်ခြေ ၂၀၀ လောက်ရှိပြီး ဒေသခံတွေအနေနဲ့ စာသင်ကျောင်းတွေမှာ သွားရောက်ခိုလှုံနေကြရတယ်လို့ ဦးဒုံမောင်က ပြောပါတယ်။
ရဟတ်ယာဉ် အသုံးပြုမှုနဲ့ ပတ်သက်ပြီး ဗိုလ်မှူးချုပ် ဇော်လင်းထွန်းက “ကျနေ်ာသိရ သလောက်ကတော့ ရဟတ်ယာဉ်ကတော့ ကျနော်တို့ ကြက်ခြေနီ ဘာညာဖြစ်တာနဲ့ ကင်းထောက်ပျံသန်းတာ ရှိနိုင်ပါတယ်။ အရပ်သား ထိခိုက်သေဆုံးမှုတော့ မရှိပါဘူးဗျာ။ အခုထိ ကျနေ်ာသိသလောက်တော့ မရှိပါဘူးဗျာ။ နယ်ခြားစောင့် ရဲအဖွဲ့ကတော့ ထိခိုက်ဆုံးရှုံးမှု ရှိနိုင်တယ်။ မကြာခင် သတင်းထုတ်ပြန်ပေးပါမယ်။”
တပ်မတော်နဲ့ အေအေ ရက္ခိုင့်တပ်မတော်တို့အကြား ရခိုင်ပြည်နယ်ထဲမှာပြီးခဲ့တဲ့ ဒီဇင်ဘာလဆန်းကတည်းက တိုက်ပွဲတွေ ဆက်တိုက် ဖြစ်ပွားနေတာဖြစ်ပြီး တိုက်ပွဲကြောင့် ထောင်နဲ့ချီတဲ့ ဒေသခံတွေ စစ်ဘေးတိမ်းရှောင် ထွက်ပြေးခိုလှုံနေကြရပါတယ်။
