ချောင်းဆုံမြို့နယ်တွင် ဖမ်းမိသည့် ကသမျှင်ငါးကြီး ကျပ်သိန်း ၅၆၀ ကျော်ဖြင့် ရောင်းချ
ပိုင်စိုး
·
November 21, 2018
မွန်ပြည်နယ်၊ ချောင်းဆုံမြို့နယ်မှာ အလျား ၆ ပေရှိ ကသမျှင်ငါးကြီးတကောင်ကို ဖမ်းမိခဲ့ပြီး ရောင်းချရာမှာ ကျပ်သိန်း ၅၆၀ ကျော် ရခဲ့တယ်လို့ စိုက်ပျိုးရေး၊ မွေးမြူရေးနဲ့ ဆည်မြောင်းဝန်ကြီးဌာန သတင်းမှာ ဖော်ပြပါတယ်။
၂၀၁၈-၁၉ လုပ်ငန်းရာသီအတွက် တင်ဒါပေးထားတဲ့ ပိုက်ချက်တွေထဲက ချောင်းဆုံမြို့နယ် ဝဲကလိ အတန်းလိုက် တင်ဒါပိုက်ချက်အမှတ် ၁ ကို ဝယ်ယူရရှိသူ ဦးမြင့်လွင်ရဲ့ ပိုက်ထဲမှာ မိခဲ့တာလို့ ဆိုပါတယ်။
နိုဝင်ဘာ ၁၁ ရက် နေ့လယ်ပိုင်းမှာ ဦးမြင့်လွင်ရဲ့ ပိုက်ချက် ၁၂ လုံးတန်းထဲက ၈ လုံးမြောက်မှာ တန်ဖိုးမြင့် ကသမျှင်ငါး အမတကောင်ကို ဖမ်းဆီးရမိခဲ့ပါတယ်။
အဲဒီ ကသမျှင်ငါးဟာ အလျား ၆ ပေ၊ အနံ ၁ ပေ ၁ လက်မရှိပြီး အလေးချိန် ၃၅ ပိသာခွဲ ရှိပါတယ်။ ဈေးကွက်ထဲ ရောင်းချရာမှာ ဒေသပေါက်ဈေး ကျပ် ၅၆၅ သိန်း ရရှိခဲ့တယ်လို့ ဝန်ကြီးဌာနက ဖော်ပြထားပါတယ်။
ပြီးခဲ့တဲ့ ၂၀၁၆ ခုနှစ်တုန်းက ကျိုက်ခမီရေလယ်ဘုရား အနောက်ဘက် အမှတ် ၂ ဘော်ယာအနီး ကမ်းခြေက ၃ မိုင်လောက်အကွာမှာ အလေးချိန် ၂၁ ပိသာရှိတဲ့ ကသမျှင် ငါးတကောင်၊ ကျိုက်ခမီမြို့ ကမ်းခြေက ၃ မိုင်လောက်အကွာ အမှတ် ၂ ဘော်ယာနဲ့ အမှတ် ၃ ဘော်ယာကြားမှာ အလေးချိန် ၃၆ ပိသာရှိတဲ့ ကသမျှင်ငါးတကောင် ဖမ်းမိခဲ့ဖူးပါတယ်။
အခု ၂၀၁၈ ဇန်နဝါရီလကုန်ပိုင်းမှာလည်း ကျိုက်ခမီမြို့ ကမ်းခြေက ၁၀ မိုင်လောက်အကွာမှာ အလေးချိန် ၁၆ ပိသာခွဲရှိတဲ့ ကသမျှင်တကောင်ကို ဖမ်းဆီးရခဲ့ပါတယ်။
ငါးလုပ်ငန်းဦးစီးဌာနအနေနဲ့ ငါး ပုစွန် ထုတ်လုပ်မှုနှုန်း မြင့်မားစေဖို့ ဒေသအတွင်း အတန်းလိုက် တင်ဒါပိုက်ချက်တွေ ချပေးနေတာမှာ ၂၀၁၈-၁၉ ခုနှစ် လုပ်ငန်းရာသီမှာ ချောင်းဆုံမြို့နယ်အတွင်း ငါးဖမ်းဆီးတဲ့ လုပ်ငန်းရှင်တွေကို တင်ဒါပိုက်ချက် ၂၅ ချက်ကို လုပ်ကိုင်ခွင့် ပြုထားပါတယ်။
