ကလေးဝ ကျောက်မီးသွေးတွင်းထဲ ပိတ်မိနေသူ ၅ ဦး၏အလောင်း တွေ့ရှိ
DVB
·
August 3, 2018
စစ်ကိုင်းတိုင်းဒေသကြီး၊ ကလေးဝမြို့နယ်ရှိ ကျောက်မီးသွေးတွင်းအထဲမှာ ပိတ်မိနေသူ ၅ ဦးကို ဒီကနေ့ မွန်းလွဲပိုင်းမှာ သေဆုံးလျက် တွေ့ရှိတယ်လို့ တိုင်းအစိုးရက သတင်းထုတ်ပြန်ပါတယ်။
သြဂုတ် ၂ ရက်ညက ကလေးဝမြို့နယ်၊ သစ်ချောက်ကျေးရွာအနီးရှိ ကုမ္ပဏီတခုရဲ့ လုပ်ကွက် ကျောက်မီးသွေးတွင်းထဲမှာ အလုပ်ဆင်းလုပ်တဲ့ ကျောက်မီးသွေးတွင်း လုပ်သားတွေ ပိတ်မိနေခဲ့တာပါ။
ကျောက်မီးသွေးဥမင်လိုဏ်ခေါင်းထဲ ပေါက်ကွဲမှုဖြစ်ခဲ့တာကြောင့် အောက်ဆီဂျင်ပိုက် ပြတ်တောက်ပြီး အထဲမှာ ပိတ်မိခဲ့တဲ့ တရုတ်နိုင်ငံသား တဦး အပါအဝင် လူငါးဦးကို ဒီကနေ့ မွန်းလွဲ ၂ နာရီလောက်မှာ အသက်သေဆုံးလျက် အပြင်သို့ ထုတ်ယူခဲ့တယ်လို့ တိုင်းအစိုးရ သတင်းမှာ ဖော်ပြပါတယ်။
ကလေးဝမြို့နယ်၊ သစ်ချောက်ကျောက်မီးသွေးဒေသ ထွန်းသွင်ကျောက်မီးသွေးတွင်းမှာ ယမန်နေ့ည ၁ နာရီခန့်က တာဝန်ကျ ငါးဦးပါ ကျောက်မီးသွေး အလုပ်ဆိုင်းတဆိုင်းဟာ လေပိုက်လိုင်း ချို့ယွင်းချက်ကြောင့် တွင်းထဲမှာ ပိတ်မိနေကြောင်း ဒီကနေ့ မနက် ၉ နာရီခန့်က မြို့နယ်အုပ်ချုပ်ရေးအဖွဲ့က သတင်းရရှိခဲ့တယ်လို့ ဆိုပါတယ်။
ဒီနောက် သက်ဆိုင်ရာ အဆင့်ဆင့်မှ ကယ်ဆယ်ကူညီရေးအဖွဲ့တွေ သွားရောက်စဉ် ဒီမနက်အစောပိုင်းက ကယ်ဆယ်ဖို့ ကြိုးပမ်းတဲ့ အလုပ်သမား လေးယောက် အသက်ရှူကျပ်ပြီး ကလေးဝဆေးရုံမှာ ဆေးကုသမှု ခံယူခဲ့ရတယ်လို့လည်း သိရပါတယ်။
အဆိုပါ ကျောက်မီးသွေးတွင်းမှာ အနက်ပေ ၆ဝဝ ရှိပြီး အတွင်းကန့်လန့်ဖြတ်လမ်း ကြောင်း ပေ ၂ဝဝ မှာ မတော်တဆမှု ဖြစ်နေတယ်လို့ ကျောက်မီးသွေးတွင်း တာဝန်ရှိသူက ရှင်းပြပါတယ်။
ကျောက်မီးသွေးတွင်းထဲကို အလုပ်သမားတွေက နာရီလိုက် အဆိုင်းတွေ ဆင်းကြရပြီး တဆိုင်းမှာ ကျွမ်းကျင် တရုတ်လုပ်သား ၁ ဦးနဲ့ မြန်မာလုပ်သား ၄ ဦး ပါဝင်တယ်လို့လည်း သိရပါတယ်။
ဓာတ်ပုံ- စစ်ကိုင်းတိုင်းအစိုးရ
