ဖယ်ခုံတောင်သူ ၄ ဦး ယာမြေကို ဆက်မလုပ်ရန် တပ်မတော် တားမြစ်
DVB
·
June 5, 2018
ရှမ်းပြည်နယ်တောင်ပိုင်း၊ ဖယ်ခုံမြို့က တောင်သူ ၄ ဦး ထွန်ယက်စိုက်ပျိုးနေတဲ့ ယာမြေကို ဆက်ပြီးမလုပ်ဖို့ တပ်မတော် ခမရ (၄၂၁)က မေလ ၃၀ ရက်မှာ မြို့နယ် အုပ်ချုပ်ရေးမှူးကတဆင့် တားမြစ်စာပေးပို့တဲ့အတွက် တောင်သူတွေ အခက်အခဲဖြစ်နေကြ ပါတယ်။
တောင်ယာလုပ်ကိုင်ဖို့ တားမြစ်ခံရတဲ့ ဒေသခံတောင်သူ ဦးမောင်အိုက်က "ကျနော်တို့ လုပ်စားစရာဒါပဲရှိတယ်။ သားသမီးပညာရေးအတွက်လည်း ဒါပဲရှိတယ်။ ဒါပဲအားကိုးရတယ်၊ သူတို့ မလုပ်ခိုင်းဘူးဆိုတော့ ကျနော်တို့ စိတ်မချမ်းသာဘူး"လို့ ဆိုပါတယ်။
စိုက်ပျိုးရာသီဖြစ်တာကြောင့် တောင်သူ ၄ ဦး လုပ်ကိုင်နေတဲ့ ၁၀ ဧကလောက်ရှိတဲ့ ယာမြေပေါ်မှာ စပါးနဲ့ ပြောင်းကို စိုက်ပျိုးလုပ်ကိုင်နေကြတာပါ။
အဆိုပါမြေနေရာမှာ တပ်မတော်က မြောင်းတူး ခြံစည်းရိုးကာရံနေပြီး တောင်သူ တွေ ဆက်လက် စိုက်ပျိုးလုပ်ကိုင်ပါက အရေးယူဆောင်ရွက်သွားမယ်လို့ ဆိုပါတယ်။
ဖယ်ခုံတောင်သူလယ်သမားကွန်ရက်ကတော့ စည်းရိုးကာရံနေတာ ရပ်တန့်ပေးဖို့နဲ့ တောင်သူတွေ ဆက်ပြီးလုပ်ကိုင်ခွင့်ရဖို့ သက်ဆိုင်ရာဌာနတွေကို စာပေးပို့သွားမှာဖြစ်ပြီး ကြေညာချက်ထုတ်ပြန်တာတွေလည်း လုပ်သွားမယ်လို့ ဆိုပါတယ်။
ဖယ်ခုံတောင်သူလယ်သမားကွန်ရက်ဥက္ကဋ္ဌ ခွန်းအန်းဂျေလိုက "ရှင်းရှင်းပြောရမယ်ဆိုရင် မတရားဘူးပေါ့။ ဌာနေတိုင်းရင်းသားလည်းဖြစ်သေးတယ်။ နောက်ပြီး ဒီဒေသရဲ့ အရင်းခံ လူလည်းဖြစ်သေးတယ်။ အဲဒါကို သူတို့က အဲ့လိုမျိုးလုပ်တော့ ကျနော်တို့ တောင်သူတွေက နည်းနည်းခံပြင်းတယ်ပေါ့နော်။"လို့ပြောပါတယ်။
တောင်သူတွေဟာ အခုယာမြေတွေပေါ်မှာ ၁၉၈၀ ပြည့်နှစ်မှာ စပြီးလုပ်ကိုင်ခဲ့တာ ဖြစ်ပြီးတော့ တပ်မတော်က ၁၉၉၁- ၉၂ ဝန်းကျင်မှာ လာရောက်အခြေစိုက်ပြီး သိမ်းယူခဲ့တာလို့ တောင်သူတွေက ပြောပါတယ်။
ပြီးခဲ့တဲ့ ၂၀၁၇ ခုနစ်မှာ ဖယ်ခုံတောင်သူတွေက လယ်ယာမြေနှင့် အခြားမြေများ သိမ်းဆည်းခံရမှုများပြန်လည်စိစစ်ရေးဗဟိုကော်မတီကို သိမ်းဆည်းထားတဲ့ မြေဧရိယာကို ပြန်လည်စိစစ်ဖို့နဲ့ အိမ်ခြံမြေနဲ့ ယာမြေတွေကို ခြံစည်းရိုးကာရံခြင်းမှ ရပ်ဆိုင်းပေးဖို့ စာတင်ခဲ့ ပေမယ့် ဖြေရှင်းပေးခဲ့တာတွေ မရှိပါဘူး။
ဖယ်ခုံမြို့ဝန်းကျင်မှာ တပ်မတော် ခမရ (၄၂၁)၊ ခမရ (၃၃၆)၊ စကက (၇) က မြေဧက ၄၀၀၀ လောက် သိမ်းဆည်းပြီး ဒေသခံတွေရဲ့ ယာမြေ၊ သင်္ချိုင်းမြေတွေနဲ့ ဒေသခံတွေ အသုံးပြုနေတဲ့ သဲသောင်တွေလည်း ပါဝင်ပါတယ်။
သတင်း၊ ဓာတ်ပုံ- ခွန်းတူးတူးလေး
