မကွေးတိုင်းတွင် သမီးရည်းစားစုံတွဲ စကားများရန်ဖြစ်ပြီး လူသတ်မှု ဖြစ်ပွား
DVB
·
April 24, 2018
မကွေးတိုင်းဒေသကြီး၊ ငဖဲမြို့နယ်၊ မာန်အောင်အုပ်စု၊ မရိုးကန်ကျေးရွာ အနောက်ဘက် ဥသျှစ်ကုန်း ရေလှောင်တမံသွားတဲ့လမ်းမှာ ဧပြီ ၂၁ ရက် ည ၈ နာရီခွဲလောက်က သမီးရည်းစား အချင်းများ ရန်ဖြစ်ရာက လူသတ်မှုဖြစ်ပွားခဲ့တယ်လို့ သိရပါတယ်။
မင်းလှမြို့နယ် ကျောက်ပုံကျေးရွာ တရွာတည်းနေ ရည်းစားဖြစ်သူနဲ့အတူ ပွင့်ဖြူမြို့ကို ဆိုင်ကယ်နဲ့ သွားရောက်ပြီး ပြန်လာရာ ငဖဲမြို့နယ်၊ မရိုးကန်ကျေးရွာ အနောက်ဘက် ဥသျှစ်ကုန်း ရေလှောင်တမံသွားတဲ့လမ်းမှာ စကားများ ရန်ဖြစ်ရာက လည်ပင်းညှစ် လူသတ်မှု ဖြစ်ခဲ့တယ်လို့ ပဒါန်းစခန်းမှူး ရဲအုပ်ကျော်ဇေယျကပြောပါတယ်။
“သေဆုံးသူ မအေးအေးဝင်း (၃၅ နှစ်) မှာ လည်ပင်း ညိုမည်းဒဏ်ရာ၊ နှာခေါင်းသွေးထွက် ဒဏ်ရာပါးစပ်မှ အရည်ထွက်လျှက်ဖြင့်သေဆုံးနေတာကို တွေ့ရှိခဲ့ပြီးလူသတ်မှု ကျူလွန်းသူမှာ ထွက်ပြေးတိမ်းရှောင်ခြင်း မရှိဘဲ ပဒါန်းရဲကင်းစခန်းသို့ ကိုယ်တိုင်လာရောက်အဖမ်းခံခဲ့တယ်"လို့ ရဲအုပ်ကျော်ဇေယျက ပြောပါတယ်။
ဖြစ်စဉ်နဲ့ ပတ်သက်လို့ မင်းလှမြို့နယ် ကျောက်ပုံကျေးရွာနေသူ ခန့်ကျော်သူ (၂၉နှစ်)ကို ပဒါန်းရဲကင်းစခန်းမှူး ရဲအုပ်ကျော်ဇေယျက တရားလိုပြုလုပ်တိုင်တန်းပြီး ငဖဲမြို့မ ရဲစခန်းမှာ ရာဇသတ်ကြီးပုဒ်မ-၃၀၂ နဲ့ အမှုဖွင့်အရေးယူထားပါတယ်။
သတင်း-မင်းထီး
