ကျောက်တံခါးမြို့တွင် အမျိုးသားတဦး အသတ်ခံရ
DVB
·
September 3, 2017
ပဲခူးတိုင်းဒေသကြီး၊ ကျောက်တံခါးမြို့နယ်၊ ဂုံမင်းကွင်းကျေးရွာအုပ်စု၊ ရမ်းတို လာကျေးရွာမှာ စက်တင်ဘာ ၂ ရက်နေ့ မနက်ပိုင်းက အမျိုးသားတဦး အသတ်ခံခဲ့ရတယ်လို့ ကျောက်တံခါးမြို့မရဲတပ်ဖွဲ့စခန်းက ပြောပါတယ်။
“သေဆုံးတဲ့ သူကတော့ မနက် ၃ နာရီလောက်ကတည်းက ငါးကောက်ဖို့ ငါးထောင်ထားတဲ့ ဆည်တဲကို ထွက်သွားတယ်လို့ သိရတယ်ဗျ။ မနက် ၆ နာရီလောက်မှ နောက်က လူတွေက လိုက်သွားလို့ အသတ်ခံထားရတာ တွေ့တာပေါ့၊ အဲဒီကျတော့မှ ကျနော်တို့က သွားရောက် စစ်ဆေးခဲ့တာပေါ့၊ တရားခံကတော့ မမိသေးပါဘူး၊ အမြန်ဆုံး တရားခံဖမ်းဆီးရမိရေး အတွက်တော့ စုံစမ်းစစ်ဆေးမှုတွေ လုပ်နေပါတယ်” လို့ ကျောက်တံခါးမြို့မရဲတပ်ဖွဲ့စခန်းက တာဝန်ရှိသူတဦးက ပြောပါတယ်။
သေဆုံးသူမှာ ကျောက်တံခါးမြို့နယ်၊ ဂုံမင်း ကွင်းကျေးရွာအုပ်စု၊ ရမ်းတိုလာကျေးရွာနေ ဂျဂ္ဂဒီးဖြစ်ပြီး ငါးကောက်ဖို့သွားရင်း နေအိမ်နဲ့ ၁ မိုင်လောက်ဝေးတဲ့ လယ်ထဲက ဆည်အတွင်းမှာ လည်ကုတ် ၈ လက်မလောက် ပြတ်ရှဒဏ်ရာနဲ့ မှောက်လျှက်သေဆုံးနေတာလို့ အဆိုပါစခန်းက ဆိုပါတယ်။
ကျောက်တံခါးမြို့မရဲတပ်ဖွဲ့စခန်းက ရာဇသတ်ကြီးပုဒ်မ-၃၀၂ နဲ့ ဖွင့်လှစ်ထားပြီး တရားခံ အမြန်ဆုံးဖမ်းဆီးရမိရေးအတွက် မြို့နယ်မှုးဒုရဲမှုး အောင်ကျော်ကျော်က စီစဉ်ဆောင်ရွက် နေတယ်လို့ သိရပါတယ်။
သတင်း-ကျော်အောင် (ကညွတ်ကွင်း )
