အိမ်စီးကားတွေ စုံရက်/မ ရက်ခွဲပြီး မောင်းနှင်အသုံးပြုရတဲ့ ပထမဆုံးရက်မှာ ရန်ကုန်မြို့အတွင်း ကားအသွားအလာအရင်ကထက် ရှင်းခဲ့ပေမဲ့ အရေးပေါ်ကိစ္စရှိပြီး ကားအသုံးပြုခွင့်မရတဲ့ အခက်တွေ့ခဲ့ရတယ်လို့ ကိုယ်ပိုင်ယာဥ်မောင်းတွေက ပြောပါတယ်။
အဲဒီစနစ် စတင်တဲ့ မတ် ၇ ရက်မှာ မရက်ဖြစ်တဲ့အတွက် မအက္ခရာ အိမ်စီးကားတွေ သွားလာအသုံးပြုခွင့်ရပြီး စုံအက္ခရာနဲ့အိမ်စီးကားတွေက ရပ်နားထားရပါတယ်။
ရန်ကုန်မြို့အတွင်း အငှားယာဥ်မောင်းတယောက်က “အရင်ရက်တွေထက် လမ်းတော်တော်ရှင်းတယ်။ ကားငှားတဲ့သူ သိပ်သိသိသာသာ ပိုရတာမျိုးမရှိပါဘူး။ ကားပိုင်အသိထဲက သူတို့ကား ထွက်မရတဲ့နေ့မှာ ခေါ်သုံးဖို့ လှမ်းချိတ်တာမျိုးရှိတယ်။ ပုံမှန်အော်ဒါရှိထားတော့ အဆင်မပြေဘူး” လို့ ပြောပါတယ်။
အခုလို စုံရက်/မရက် သတ်မှတ်တာကြောင့် အရေးပေါ်ကိစ္စရှိသူတွေ အခက်တွေ့ကြရပြီး ရေရှည် ကျင့်သုံးရင် ထိခိုက်နစ်နာစရာ ပိုများလာနိုင်တယ်လို့ မြောက်ဥက္ကလာမြို့နယ်မှ ကားပိုင်ရှင်တယောက်က ပြောပါတယ်။
“အိမ်က အမေကို ဆေးရုံရက်ချိန်း ပုံမှန်ပြရမှာရှိတယ်။ ကိုယ့်အလုပ်ကိစ္စနဲ့ သွားလာရမှာရှိတယ်။ ရက်ရွေးပြီးလုပ်လို့ ရတဲ့ကိစ္စတွေမဟုတ်ဘူး။”
အဲဒီလို စုံရက်/မ ရက် သတ်မှတ်အသုံးပြုတဲ့စနစ် ကျင့်သုံးမဲ့ကာလကို စစ်ကောင်စီက အသိပေးထားတာ မရှိပါဘူး။
ဌာနစုံပူးပေါင်းအဖွဲ့က စစ်ဆေးသွားမှာဖြစ်ပြီး လိုက်နာဖို့ပျက်ကွက်ရင် ထောင်ဒဏ်တလ (ဒါမှမဟုတ်) ဒဏ်ကြေးငွေကျပ် ၂၀,၀၀၀ ချမှတ်အရေးယူဖို့ ညွှန်ကြားချက်ထုတ်ထားတယ်လို့ မြို့နယ်အဆင့်အုပ်ချုပ်ရေးအဖွဲ့ဝင်တွေဆီက သိရပါတယ်။
