အမေရိကန်ပြည်ထောင်စုရဲ့ ရန်ပုံငွေဖြတ်တောက်မှုတွေအပြီး ကုလသမဂ္ဂ ဖွံ့ဖြိုးရေးအစီအစဉ် (UNDP) က ဇန်နဝါရီ ၂၀ ရက်မှာ နယူးယောက်ဌာနချုပ်က ဝန်ထမ်း အယောက်၃၀၀ နီးပါးကို ဂျာမနီနိုင်ငံ ဘွန်းမြို့နဲ့ နောက်ထပ်အယောက် ၁၀၀ကို စပိန်နိုင်ငံဆီ ရွှေ့ဖို့ ဆုံးဖြတ်ချက်ကို ဂျာမနီနိုင်ငံက ကြိုဆိုခဲ့ပါတယ်။
ဒီလှုပ်ရှားမှုဟာ ပြောင်းလဲနေတဲ့ ဘဏ္ဍာရေးနဲ့ ဖွံ့ဖြိုးတိုးတက်ရေး ရှုခင်းကို လိုက်လျောညီထွေ ဖြစ်အောင် လုပ်ဖို့ မိတ်ဖက်ဆက်ဆံရေးကို အားကောင်းစေဖို့နဲ့ ကမ္ဘာ့အထိခိုက်လွယ်ဆုံး လူတွေကို ပံ့ပိုးဖို့ UNDP ရဲ့ စွမ်းရည်ကို အမြင့်ဆုံးဖြစ်အောင် ဆောင်ရွက်ရေး ကြိုးပမ်းမှုရဲ့ တစိတ်တပိုင်း ဖြစ်တယ်လို့ အဖွဲ့အစည်းက ဇန်နဝါရီ ၁၉ ရက်မှာ ပြောပါတယ်။
ကုလသမဂ္ဂစနစ်နဲ့ ဘက်ပေါင်းစုံမူတွေဟာ ဖိအားပေးခံနေရလို့ ၂ နှစ်ကြာမဲ့ လုပ်ဆောင်မှုဟာ ဂျာမနီရဲ့ သံခင်းတမန်ခင်းအပေါ် ယုံကြည်မှုကို ပြနေတယ်လို့ ဂျာမနီနိုင်ငံခြားရေးဝန်ကြီး ယိုဟန် ဝါဒီဖူးလ်က သီးခြားရေးသားထားတဲ့ ထုတ်ပြန်ချက်တခုမှာ ပြောပါတယ်။
ဘွန်းမြို့ရဲ့ မြို့တော်ဝန်အပြင် ဒေသခံတွေနဲ့ UNDP မိတ်ဖက်အဖွဲ့အစည်း တခုတို့ကလည်း ဝမ်းမြောက်ကြောင်း ဖော်ပြခဲ့ပါတယ်။
ဒေသခံ ကာမန် ဘလူးမ်က “ဘွန်းအတွက် UNDP ဟာ မြို့ရဲ့ နိုင်ငံတကာစရိုက်လက္ခဏာကို ပိုအားကောင်းစေတယ်လို့ အဓိပ္ပာယ် ရတယ်။ ဒါက အလွန်ကောင်းမွန်တယ်လို့ ကျနော်ထင်ပါတယ်”လို့ ပြောပါတယ်။
ဘွန်းမြို့ဟာ နှစ်ပေါင်း ၇၅ နှစ်တာ သက်တမ်းရှိတဲ့ ကုလသမဂ္ဂမြို့ တမြို့ဖြစ်ခဲ့တယ်လို့ မြို့တော်ဝန် ဂီဒို ဒေးယပ်စ်က ရိုက်တာ သတင်းဌာနကို ပြောပါတယ်။
“ကျနော်တို့မှာ ဝန်ထမ်း ၁၂၀၀ လောက် ရှိတဲ့ အဖွဲ့အစည်း ၂၇ ခုရှိပါတယ်။ အခု ၃၀၀ ထပ်တိုးပါမယ်။ အဲဒါက ၂၅ ရာခိုင်နှုန်းပါ။ ဒါဟာ မှန်ကန်တဲ့ လမ်းကြောင်းပေါ်က ခြေလှမ်းကြီးတခုပါ။”
ပြီးခဲ့တဲ့နှစ်က အမေရိကန်သမ္မတ ဒေါ်နယ်ထရမ့်ပ်ဟာ ဘီလီယံနာ အီလွန်မတ်စ်ခ် ဦးဆောင်တဲ့ အစိုးရပြုပြင်ပြောင်းလဲရေးရဲ့ တစိတ် တပိုင်းအနေနဲ့ အမေရိကန်ရဲ့ နိုင်ငံခြားဖွံ့ဖြိုးတိုးတက်ရေး အကူအညီကို ၈၀ ရာခိုင်နှုန်းကျော် လျှော့ချခဲ့ပါတယ်။
Source:Reuters
