ပြည်သူ့ရှေ့ဆောင်ပါတီ (PPP) ဥက္ကဋ္ဌ ဒေါ်သက်သက်ခိုင်နဲ့ အဖွဲ့ဝင်ကို ခွင့်ပြုချက်မရှိဘဲ သံရုံးတွေ၊ အဖွဲ့အစည်းတွေနဲ့ လျှို့ဝှက်စွာတွေ့ဆုံခဲ့တာကြောင့် အရေးယူသွားမယ်လို့ စစ်တပ်ဩဇာခံ  ပြည်ထောင်စုရွေးကောက်ပွဲကော်မရှင်က ဇန်ဝါရီ ၁၄ ရက်မှာ ထုတ်ပြပါတယ်။

ပြည်သူ့ရှေ့ဆောင်ပါတီဥက္ကဋ္ဌ ဒေါက်တာသက်သက်ခိုင်နဲ့ ဗဟိုအလုပ်အမှုဆောင် အဖွဲ့ဝင် ဒေါ်ထက်ထက်လှိုင်တို့ဟာ ပြည်ထောင်စုရွေးကောက်ပွဲ ကော်မရှင်ဆီမှာ ခွင့်ပြုချက် တင်ပြတာမရှိဘဲ ၂၀၂၅ ခုနှစ်၊ ဒီဇင်ဘာလ ၁၈ ရက် ၂ နာရီမှ ၃ နာရီအထိ ရန်ကုန်၊ ဗဟန်းမြို့နယ်၊ နတ်မောက်လမ်းရှိ စားသောက်ဆိုင်တဆိုင်မှာ ပြည်ပသံရုံးတရုံးက ပုဂ္ဂိုလ်တချို့နဲ့ Mask တပ်ဆင်ပြီး တရားမဝင် လျှို့ဝှက်စွာတွေ့ဆုံခဲ့တာနဲ့ပတ်သက်လို့ သတင်းပို့တိုင်ကြားမှုရှိခဲ့တယ်လို့ သိရပါတယ်။

ဒီနောက် ဇန်နဝါရီ ၁၂ ညပိုင်းကမှာ စစ်တပ်က ဒေါက်တာသက်သက်ခိုင်ကို သူ့ရဲ့နေအိမ်မှာ လာရောက် ဖမ်းဆီးသွားခဲ့တာဖြစ်ပြီး ဗဟိုအလုပ်အမှုဆောင် အဖွဲ့ဝင် ဒေါ်ထက်ထက်လှိုင်ကိုလည်း တပြိုင်နက်တည်းမှာ ဖမ်းဆီးခဲ့တာ ဖြစ်ပါတယ်။

ပါတီဥက္ကဋ္ဌ ဒေါက်တာသက်သက်ခိုင်နဲ့ ဒေါ်ထက်ထက်လှိုင်တို့ကလည်း ဒီတွေ့ဆုံမှု မှန်ကန်တယ်လို့ ဝန်ခံထွက်ဆိုခဲ့တာကြောင့် ဥပဒေနဲ့ အညီ အရေးယူဆောင်ရွက်သွားမယ်လို့ ထုတ်ပြန်ချက်မှာ ဖော်ပြပါတယ်။

ပါတီတာဝန်ရှိသူတယောက်က "ဒီကိစ္စနဲ့ပတ်သက်ပြီးတော့ ဘာမှပြောစရာမရှိပါဘူး။ သူတို့ထုတ်ပြန် တဲ့အတိုင်းပါပဲ။ မေးစရာရှိလို့ဆိုပြီး လာခေါ်သွားတာ။ အပြင်မှာကျန်တဲ့ပါတီဝင်တွေကတော့ ရွေးကောက်ပွဲနဲ့ပတ်သက်တဲ့ ပါတီအလုပ်တွေကိုဆက်လုပ်သွားမယ်။ ကြိုးစားသွားမယ်"လို့ ပြောပါတယ်။

နိုင်ငံရေးပါတီတွေအနေနဲ့ ဖွဲ့စည်းပုံအခြေခံဥပဒေ ပုဒ်မ ၄၀၇ (ဂ)၊ ပုဒ်မ ၄၀၈ နဲ့ နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၆(စ)ပါ ပြဋ္ဌာန်းချက်များအရ “ နိုင်ငံခြားတိုင်းပြည် တခုခု၏အစိုးရ သို့မဟုတ် ဘာသာရေးအဖွဲ့အစည်း သို့မဟုတ် အခြားအဖွဲ့အစည်းတခုခု သို့မဟုတ် ပုဂ္ဂိုလ်တဦးဦးထံမှ ငွေကြေး၊ ပစ္စည်း၊ အခြားအထောက်အပံ့ကို တိုက်ရိုက်ဖြစ်စေ၊ သွယ်ဝိုက်၍ဖြစ်စေ ရယူသုံးစွဲခြင်း သို့မဟုတ် ယင်းတို့၏ဩဇာခံယူခြင်း မပြုရေး " ကို စောင့်ထိန်း လိုက်နာရန်တာဝန်ရှိပြီး လိုက်နာရန်ပျက်ကွက်ပါက နိုင်ငံရေးပါတီအဖြစ် မှတ်ပုံတင်ထားခြင်းကို ပယ်ဖျက်ရမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်က ၂၀၂၂ ခုနှစ် ဩဂုတ် ၁၁ ရက်မှာ နိုင်ငံရေးပါတီအားလုံးကို အကြောင်းကြားခဲ့ပြီး ဖြစ်တယ်လို့ ဆိုပါတယ်။

ဒါ့အပြင် နိုင်ငံရေးပါတီတွေအနေနဲ့ နိုင်ငံခြားတိုင်းပြည်တခုခုရဲ့ အဖွဲ့အစည်း ဒါမှမဟုတ် လူပုဂ္ဂိုလ်တွေနဲ့ တွေ့ဆုံဖို့ရှိပါက ပြည်ထောင်စုရွေးကောက်ပွဲကော်မရှင်သို့ ကြိုတင်တင်ပြပြီး ခွင့်ပြုချက်ရရှိမှသာ တွေ့ဆုံဖို့  ၂၀၂၂ ခုနှစ် ဩဂုတ် ၂၃ ရက်မှာ ထပ်မံအကြောင်းကြားခဲ့တယ်လို့လည်း ဆိုပါတယ်။

လက်ရှိမှာတော့ ဒေါက်တာသက်သက်ခိုင်နဲ့ ဒေါ်ထက်ထက်လှိုင်တို့ကို ခံဝန်နဲ့ပြန်လွှတ်ပေးထား တယ်လို့ သိရပါတယ်။

၂၀၂၅ ရွေးကောက်ပွဲမှာ ဒေါ်သက်သက်ခိုင်အနေနဲ့ ရန်ကုန်တိုင်းရွေးကောက်ပွဲမဲဆန္ဒနယ် အမှတ် ၂ ကနေ အမျိုးသားလွှတ်တော်ကိုယ်စားလှယ်လောင်းအဖြစ် ဝင်ပြိုင်ဖို့စီစဥ်ခဲ့ပေမဲ့ ငွေကြေး အရှုပ်အရှင်းကြောင့် စစ်တပ်က နိုဝင်ဘာ ၂၅ ရက်မှာ ကိုယ်စားလှယ်လောင်းအဖြစ်ကနေ ရုပ်သိမ်းခဲ့ပါတယ်။

အာဏာသိမ်းစစ်တပ်က ပြုလုပ်တဲ့ ၂၀၂၅ ရွေးကောက်ပွဲမှာ ပြည်သူ့ရှေ့ဆောင်ပါတီက ပြည်သူ့လွှတ်တော် ၁၉၃ နေရာ၊ အမျိုးသားလွှတ်တော် ၁၄၅ နေရာ၊ တိုင်းဒေသကြီးလွှတ်တော် ၃၂၀ နေရာနဲ့ တိုင်းရင်းသားလူမျိုးစုလွှတ်တော် ၁၄ နေရာ စုစုပေါင်း ၆၇၂ ဝင်ပြိုင်ခဲ့ပေမဲ့ ပထမပိုင်းနဲ့ ဒုတိယပိုင်းအပြီးအထိ အနိုင်ရတဲ့ကိုယ်စားလှယ်မရှိသေးပါဘူး။