ရန်ကုန်မြို့၊ ကမ္ဘာအေးဘုရားလမ်းပေါ်ရှိ မြန်မာပလာဇာရှေ့မှာ ဒီဇင်ဘာ ၁၀ ရက် ည ၁၀ နာရီခွဲဝန်းကျင်က သရုပ်ဆောင် မိုးအောင်ရင်ရဲ့ ကားကနေတဆင့် ကား ၆ စီး ဆင့်တိုက်မှု ဖြစ်ပွားခဲ့တယ်လို့ အမှတ် ၂ ယာဉ်ထိန်းရဲတပ်ဖွဲ့ခွဲမှူးရုံးကနေ သိရပါတယ်။
မိုးအောင်ရင်ရဲ့ ကားဟာ ကုက္ကိုင်းတံတားပေါ်ကနေ အရှိန်နဲ့ မောင်းနှင်လာပြီး မီးပွိုင့်မှာ ရပ်ထားတဲ့ ကားတွေကို တိုက်မိရာမှ ဆင့်ကဲတိုက်မှုဖြစ်ပေါ်ခဲ့တာလို့ ဆိုပါတယ်။
ယာဉ်ထိန်းရဲအရာရှိတယောက်က “ဖြစ်စဉ်ကမှန်တယ်။ မိုးအောင်ရင်ရဲ့ကားကနေ စတိုက်တာ။ သူ့ကိုစစ်ကြည့်လိုက်တော့ ဆေးသုံးထားတာတွေ့ရတယ်။ ဆေးကွဲပြီးမောင်းလာတယ့်သဘော။ အခုတော့ အမှုဖွင့်ဖို့လုပ်နေတယ်” လို့ ပြောပါတယ်။
ယာဉ်တိုက်မှုကြောင့် ထိခိုက်ဒဏ်ရာမရရှိပေမဲ့ ကားတွေကတော့ တော်တော်များများ ထိခိုက်ပျက်စီးခဲ့တယ်လို့ သိရပါတယ်။
သရုပ်ဆောင် မိုးအောင်ရင်ဟာ ၂၀၁၆ ခု သြဂုတ်လအတွင်း မူးယစ်ဆေးဝါးနဲ့အတူ ဖမ်းဆီးရမိခဲ့တာကြောင့် ၂၀၁၈ ခု နိုဝင်ဘာမှာ ပုဇွန်တောင်မြို့နယ် တရားရုံးက ထောင်ဒဏ် ၅ နှစ်နဲ့ ရန်ကုန်အရှေ့ပိုင်းခရိုင် တရားရုံးက ထောင်ဒဏ် ၁၂ နှစ် ကျခံစေဖို့ အမိန့်ချမှတ်ခဲ့ပြီးနောက် ၂၀၁၉ ခု မေ ၇ ရက်မှာ လွတ်ငြိမ်းချမ်းသာခွင့်နဲ့ ပြန်လွတ်လာခဲ့ပါတယ်။
