စစ်အာဏာသိမ်းမှုအောက်မှာ အထွေထွေကျပ်တည်းမှုတွေကြားက အသံမဲ့ပြည်သူတွေရဲ့ အသံနဲ့ အရုပ်တွေထပ်ပိုတဲ့ ပြည်သူ့ဘဝတွေကို ပုံဖော်ထားတဲ့ မှတ်တမ်းရုပ်ရှင်ကောင်းတွေကို ကြည့်ရှုရမယ့် DVB Peacock Film Festival ကို ထိုင်းနိုင်ငံ၊ ချင်းမိုင်မြို့မှာ လာမယ့် ဒီဇင်ဘာ ၈ ရက်ကနေ ၁၀ ရက်အထိ ပြသတော့မှာဖြစ်ပါတယ်။

အခုနှစ်ရုပ်ရှင်ပွဲတော်ရဲ့ ခေါင်းစဉ်မှာ Giving Voice to Voiceless ဖြစ်ပြီး DVB က ကြီးမှူးကျင်းပတဲ့ လေးကြိမ်မြောက်ရုပ်ရှင်ပွဲတော်လည်းဖြစ်ပါတယ်။

DVB Peacock Film Festival စီစဉ်သူ မချမ်းသီရိစိုးက “ဒီပွဲတော်ဟာ အရုပ်တွေအသံတွေကို ပေါင်းစပ်ထားတဲ့ ရုပ်ရှင်မဟုတ်ပါဘူး။  ကျမတို့ပြည်သူတွေရဲ့ မှတ်တမ်းတွေ၊ ဂုဏ်သိက္ခာတွေ မျှော်လင့်ချက်တွေဖြစ်ပါတယ်။ ဒါ့ကြောင့်  ကျမတို့မှာရှိတဲ့ ဘတ်ဂျက်နဲ့ အကန့်အသတ်တွေ ကြားကနေပဲ မြန်မာပြည်က အသံတွေကို ကမ္ဘာတဝန်းက ကြားနိုင်တဲ့အထိ ကျယ်ကျယ်ပြန့်ပြန့် ဖြစ်အောင်လုပ်ဖို့ဆုံးဖြတ်ထားပါတယ်’’ လို့ နိုဝင်ဘာ ၃၀ ရက်က ပြုလုပ်တဲ့ အကြိုသတင်းစာရှင်းလင်းပွဲနဲ့ မှတ်တမ်းရုပ်ရှင်တချို့ မိတ်ဆက်ပွဲမှာ ပြောကြားခဲ့ပါတယ်။

ရုပ်ရှင်ပွဲတော်မှာတော့  DVB က ရွေးချယ်ထောက်ပံ့ထားတဲ့ မှတ်တမ်းရုပ်ရှင် ရိုက်ကူးသူတွေ ဖန်တီးမယ့် ရုပ်ရှင်ကားတွေကို စုစည်းပြသမယ့် DVB Shot Docs Content နဲ့ အတူ မြေပြင်က ပြည်သူပြည်သားသတင်းသမားတွေ ကိုယ်တိုင် ဖန်တီးရိုက်ကူးထားတဲ့ CJ shots နဲ့ အတူ ရုပ်သံဆောင်းပါး စုစုပေါင်း ဇာတ်ကားပေါင်း ၃၀ ကို ပြသသွားမှာဖြစ်ပါတယ်။

ဒါ့အပြင် DVB Peacock Film Festival ဟာ မှတ်တမ်းရုပ်ရှင်ဇာတ်ကားကောင်းတွေ ပြသဖို့သက်သက်ပဲ မဟုတ်ပါဘဲ မျိုးဆက်သစ် ဇာတ်လမ်းပြောသူတွေအတွက် အခွင့်အလမ်းတွေ ဖန်တီးပေးမယ့် နေရာတခုလည်း ဖြစ်ပါတယ်။

ရုပ်ရှင်ပွဲတော်သုံးရက်တာအတွင်းမှာ ဝါသနာရှင်တွေနဲ့ မှတ်တမ်းရုပ်ရှင်ဖန်တီးမယ့် လူငယ်တွေအတွက် အလုပ်ရုံဆွေးနွေးပွဲတွေကိုလည်း ပူးတွဲပြုလုပ်သွားမှာဖြစ်ပြီး အစားအသောက်ရောင်းချတဲ့ ပွဲတော်နဲ့အတူ ထိုင်းနိုင်ငံ ချင်းမိုင်မြို့က ချင်းမိုင်တက္ကသိုလ်အတွင်း Communication Innovation Center မှာ ပြုလုပ်သွားမှာ ဖြစ်ပါတယ်။

ဓာတ်ပုံ- စောမင်းသိန်း