အာဏာသိမ်းစစ်တပ်ကို အားပေး ထောက်ခံခဲ့တဲ့ လူရွှင်တော် ဒိန်းဒေါင်နဲ့အဖွဲ့ကို စစ်အာဏာရှင်ဆန့်ကျင်သပိတ်မှောက်နေသူတွေရော တပ်ထောက်ခံသူတွေကပါ ပွဲမငှားတော့လို့ စားဝတ်နေရေးအတွက် ရပ်တည်ဖို့ ခက်ခဲလာတယ်လို့ လူရွှင်တော်အသိုက်အဝန်း ဆီက သိရပါတယ်။

စစ်တပ်ကို ထောက်ခံပေမဲ့ စစ်တပ်ကပါ ပွဲမငှားလို့ ရပ်တည်ဖို့ ခက်ခဲနေတယ်လို့ အောက်တိုဘာ ၁၁ ရက်က မြောက်ဒဂုံမြို့နယ်၊ ၄၈ ရပ်ကွက်မှာ ပြုလုပ်တဲ့ လူရွှင်တော်ရွာစီမံကိန်း ပန္နက်ရိုက်ပွဲမှာ ဟာသပညာရှင်အစည်းအရုံးဥက္ကဋ္ဌ ဒိန်းဒေါင် ကိုယ်တိုင်က ပြည်တွင်းမီဒီယာတွေမှာ ပြောဆိုခဲ့ပါတယ်။

“ဒိန်းဒေါင်ပါတဲ့ ရုပ်ရှင်ကားတွေ ရုံတင်တဲ့အခါ လူလာမကြည့်ရင် မင်းတာဝန်ယူမလားဆိုတဲ့ ပရိုဂျူဆာတွေ ဒါရိုက်တာတွေလည်း ရှိတယ်။ အခုက ဘယ်သူကားရိုက်ခေါ်မလဲ ဘယ်သူပွဲငှားမလဲ စောင့်ရတဲ့အနေအထား ဖြစ်နေပြီ။ ဥပမာ ကျနော် ပွင့်ပွင့်လင်းလင်း ရိုးရိုးသားသားပြောမယ်၊ တဖက်က မငှားရင် တဖက်ကတော့ ငှားသင့်တယ်။”

စစ်ကောင်စီရဲ့ တိုင်းရုံးတွေ၊ ဌာနဆိုင်ရာတွေမှာ ၂၀၂၃ ခုနှစ်လောက်အထိ ဖျော်ဖြေခဲ့ရ​ပေမဲ့ ၂၀၂၄ ခုနှစ်ကစပြီး ဒီနေ့အထိ ငှားရမ်းတာတွေ မရှိတော့ဘူးလို့ ဒိန်းဒေါင်က ဆိုပါတယ်။

မြဝတီရုပ်မြင်သံကြားမှာ တနှစ်တကြိမ်လောက်သာ ရိုက်ရပြီး မြန်မာ့ရုပ်မြင်သံကြားမှာတော့ တကြိမ်ပဲ ရိုက်ရသေးတယ်လို့ ဆက်ပြောပါတယ်။

လူရွှင်တော်ဒိန်းဒေါင်ကို ရုပ်ရှင်ဇာတ်ကား ၂ ကားမှာ ဇာတ်ပို့နေရာကနေ သရုပ်ဆောင်ဖို့ ထုတ်လုပ်ရေးကုမ္ပဏီတခုက စီစဥ်ခဲ့ပေမဲ့ ဒါရိုက်တာနဲ့ သရုပ်ဆောင်တွေက ဝိုင်းဝန်းကန့်ကွက်ခဲ့တာကြောင့် အခုထိမခေါ်တာလို့ ရုပ်ရှင်လောကသားတယောက်က DVB ကို ပြောပါတယ်။

၂၀၂၂ ခုနှစ် နောက်ပိုင်းကစပြီး လူရွှင်တော်ဒိန်းဒေါင်က စစ်ခေါင်းဆောင်ကြိုဆိုပွဲနဲ့ တိုင်းရင်းသားလက်ကိုင်တွေကို ဆန့်ကျင်ဆန္ဒပြပွဲတွေမှာ ပါဝင်ခဲ့ပေမဲ့ စစ်တပ်ကရိုက်ကူးတဲ့ ဇာတ်ကားတွေမှာ ခေါ်ယူတာမရှိသလို ဝန်ကြီးဌာနတွေက ပြုလုပ်တဲ့ ပွဲလမ်းသဘင်တွေမှာလည်း သူ့ကို ခေါ်မသုံးတော့ကြောင်း ပြန်ကြားရေးနဲ့နီးစပ်တဲ့ သတင်းအရင်းအမြစ်က DVB ကို ပြောပါတယ်။

“စစ်တပ်က ဂုဏ်ပြုဇာတ်ကားတွေ ရိုက်မယ်ဆိုရင်တောင် မကြီးစိုးတို့ ခန့်စည်သူတို့ မေသဥ္ဇာဦး၊ ဟာသဆိုလည်း တခြားလူတွေပဲခေါ်တော့တယ်။ ၆၁ နှစ်မြောက် ရဲတပ်ဖွဲ့နေ့ ဂုဏ်ပြုဇာတ်လမ်းမှာတောင် စစ်တပ်ကို ထောက်ခံသူချင်း အတူတူ ဒိန်းဒေါင်ကို မခေါ်ဘူး။ ခင်လှိုင်နဲ့ သွက်လက်ပဲ ခေါ်သုံးတာ၊ သူပါတဲ့ဇာတ်ကားဆို လူတွေမကြည့်မှာစိုးလို့။”

စစ်တပ်ကို အစဥ်တစိုက် ထောက်ခံခဲ့တဲ့အတွက် ၂၀၂၃ ခုနှစ် ဇူလိုင်လမှာ စစ်ခေါင်းဆောင်က လူရွှင်တော်တွေ အားလုံးအတွက် ဆိုပြီး မြောက်ဒဂုံမြို့နယ်၊ ၄၈ ရပ်ကွက်က မြေ ၅ ဧကကို ပေးခဲ့ပါတယ်။

၂၀၂၄ ခုနှစ် သြဂုတ်လမှာ MNDAA အဖွဲ့က ရမခတိုင်းစစ်ဌာနချုပ်ကို သိမ်းဆည်းရမိချိန်မှာ လူရွှင်တော် ဒိန်းဒေါင်နဲ့အဖွဲ့က နေပြည်တော်မှာ တိုင်းရင်းသားလက်နက်ကိုင်အဖွဲ့တွေကို ကန့်ကွက် ဆန္ဒပြခဲ့ပါတယ်။

စစ်တပ်အာဏာသိမ်းတာကို လူထုက လက်မခံဘဲ စုပေါင်းအားနဲ့ တွန်းလှန်နေစဥ် ပြည်သူလူထုက ယုံကြည်ရတဲ့ အနုပညာရှင်တယောက်က စစ်တပ်နဲ့ ပူးပေါင်းတဲ့အတွက် ပြည်သူတွေက လူမှုရေးပြစ်ဒဏ် အဖြစ် အခုလိုဒဏ်ခတ်တာလို့ အနုပညာအသိုက်အဝန်းက သုံးသပ်ကြပါတယ်။

စစ်တပ် အာဏာသိမ်းပြီးချိန်ကစပြီး ရှေ့တန်းစစ်သည်တွေကို ဖျော်ဖြေရေးနဲ့ ရန်ပုံငွေကပွဲတွေမှာ ပါဝင်ခဲ့တဲ့ ဒိန်းဒေါင်ကို စစ်ခေါင်းဆောင်က ၂၀၂၂ ခုနှစ် လူမှုထူးချွန်ဆု ဒုတိယအဆင့်ကို ပေးခဲ့ပါတယ်။

ဒိန်းဒေါင်ဟာ ပြီးခဲ့တဲ့ ဇူလိုင် ၁၄ ရက်က နေပြည်တော် မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၂ Plenary Hall မှာ ဝန်ကြီး ဦးမောင်မောင်အုန်း၊ ဗိုလ်ချုပ်ဇော်မင်းထွန်းတို့နဲ့ ပူးပေါင်းကာ သက်ကြီးပညာရှင် ကန်တော့ပွဲနဲ့ ဟာသပညာရှင်ဆုပေးပွဲ လုပ်ခဲ့တာလည်း ရှိပါတယ်။