ရှမ်းပြည်နယ်​မြောက်ပိုင်း၊ သိန္နီမြို့မှာ စက်တင်ဘာ ၂၆ ရက်​ မနက်က အများပြည်သူရှေ့မှာ ပြစ်ဒဏ်စီရင်ပွဲလုပ်ခဲ့ပြီး ပြစ်မှုကြီးကျူးလွန်ခဲ့သူ ကိုးကန့် MNDAA တပ်ဖွဲ့ဝင် ၂ ယောက် အပါအဝင် ၃ ယောက်ကို သေဒဏ်ချမှတ်ခဲ့ပါတယ်။

အမှု ၄ ခုမှာ ပါဝင်သူ ၇ ယောက်ကို စီရင်ဆုံးဖြတ်တာဖြစ်ပြီး ဒီထဲမှာ MNDAA တပ်ဖွဲ့ဝင် ၃ ယောက်ပါဝယ်လို့ MNDAA ရဲ့ ထုတ်ပြန်ချက်အရသိရပါတယ်။

​​ဒေသခံတယောက်က “ဒီ​နေ့ စက်တင်ဘာ ၂၆ ရက်​နေ့ မနက်ပိုင်း ​သိန္နီမှာ ​သေဒဏ်ရှိတယ်။ MNDAA ​​ရောက်လာမှ ​သေဒဏ်ဆိုတာ မြင်ဖူးတယ်” လို့ ​ ​ပြောပါတယ်။

သိန္နီခရိုင် မုန်ဘမြို့နယ်မှာနေတဲ့ ကျော်နိုင်လတ်ဟာ သူ့ရဲ့တူဖြစ်သူနဲ့ ခြေညှပ်ဖိနပ်တရံကို သူပိုင်တယ် ငါပိုင်တယ်လို့ငြင်းရင်း တူဖြစ်သူက တူရွင်းနဲ့ ဗိုက်ကိုရိုက်တာကြောင့် ဓားနဲ့ပြန်ခုတ်ပြီး လူသေဆုံးစေခဲ့လို့ သေဒဏ်ချခဲ့ပေမဲ့ ၂ နှစ်ဆိုင်းငံ့ခဲ့တယ်လို့ သိရပါတယ်။

နောက်အမှုကတော့ MNDAA တပ်သား ဟန်လူမျိုး လီကျင်ဖူ ဟာ ၂၀၂၅ ခုနှစ်၊ ဩဂုတ်လက သူ့ရဲ့ချစ်သူကို စစ်သုံးဓားနဲ့သတ်ပြီး အလောင်းဖျောက်ဖျက်ခဲ့တာကြောင့် စစ်မှုထမ်းပြစ်မှုများ ကိုင်တွယ်ဖြေရှင်းရန် ယာယီစည်းမျဉ်းအရ တပ်ကထုတ်ပြီး သေဒဏ်ချမှတ်ပါတယ်။

နောက်ထပ်လည်း MNDAA တပ်သား ၂ ယောက်ဖြစ်တဲ့ ရန်ရှင်းဖား နဲ့ ကိုက်ညွှန်း တို့ဟာ ၂၀၂၅ ခုနှစ် မတ်လတုန်းက အမဲလိုက်ပြီးပြန်လာတုန်း လမ်းဘေးကကုန်တင်ကားတစီးကို ဓားပြတိုက်ခဲ့ကြပြီး ကားမှာပါသူ ၂ ယောက်ကို သတ်ဖြတ်ခဲ့သလို ကားထဲက ဖုန်း၊ ပစ္စတိုနဲ့ ငွေသား စတဲ့ပစ္စည်းတွေကိုယူသွားခဲ့ကြပါတယ်။

ဒါကြောင့် ဦးဆောင်သူ ရန်ရှင်းဖား ကို တပ်ကထုတ်၊ သေဒဏ်ချမှတ်ပြီး ကိုက်ညွှန်းကိုတော့ တပ်ကထုတ် ထောင်ဒဏ် ၅ နှစ်ချမှတ်ခဲ့ပါတယ်။

နောက်အမှုတခုကတော့ တင်မိုးဝင်း၊ သုတကိုကိုနဲ့ ကောင်းဒွေးကျော်နဲ့ ဇော်ညီဝင်းတို့ဟာ နားမခေါ်ရွာက ဆိုင်ပိုင်ရှင်တယောက်ကို ပြန်ပေးဆွဲပြီး ငွေနဲ့ပြန်ရွေးချိန်မှာ အထူးဒေသရဲတပ်ဖွဲ့က ပိတ်ဆို့ဖမ်းဆီးခဲ့ပါတယ်။

အဲဒီအချိန် ပြန်ခုခံတာကြောင့် ရဲတွေက သေနတ်နဲ့ပစ်လို့ ဇော်ညီဝင်းက သေဆုံးခဲ့ပြီး ကျန် ၃ ယောက်ကိုတော့ ဖမ်းမိခဲ့ပါတယ်။

သူတို့ထဲက ဦးဆောင်သူ တင်မိုးဝင်ကို ထောင် ၁၅ နှစ်နဲ့ ဒဏ်ငွေ ယွမ် ၁ သောင်း၊ ကောင်းဒွေးကျော်နဲ့ သုတကိုကို တို့ကိုတော့ ထောင် ၁၂ နှစ်နဲ့ ယွမ် ၆,၀၀၀ ဒဏ်ကြေးချမှတ်ခဲ့ပါတယ်။ သေဆုံးသူ ဇော်ညီဝင်းကိုတော့ ပြစ်ဒဏ်ချမှတ်တာမလုပ်ခဲ့ပါဘူး။

သေဒဏ်ချမှတ်ခံရသူတွေကို သေဒဏ်စီရင်ရာနေရာကို ပို့ဆောင်ပြီး သေနတ်နဲ့အဆုံးစီရင်ခဲ့သလို ကျန်တဲ့သူတွေကိုတော့ ကားနဲ့တင်ပြီး မြို့နေလူထုကိုပြသခဲ့တယ်လို့လည်း MNDAA က ထုတ်ပြန်ထားပါတယ်။

ကိုးကန့်တပ်ဖွဲ့ (MNDAA) က လားရှိုးကို ထိန်းချုပ်ထားတုန်းကာလ ပြီးခဲ့တဲ့ ဧပြီ ၁၀ ရက်​နေ့ကလည်း ကြီးကြီးမားမား ပြစ်မှုကျူးလွန်သူ ၆ ယောက်ထဲက ၄  ယောက်ကို ​သေဒဏ်ချမှတ်ခဲ့ဖူးပါတယ်။

​ပြီးခဲ့တဲ့ ၂၀၂၄ ခုနှစ်၊ ဒီဇင်ဘာ ၅ ရက်​ ကလည်း လောက်ကိုင်မှာ ရာဇဝတ်မှုကျူးလွန်သူ ၂၁ ယောက်ထဲက ၇ ယောက်ကို MNDAA က ​သေဒဏ်စီရင်ခဲ့သလို ၂၀၂၄ ခုနှစ် ဧပြီလမှာလည်း ရာဇဝတ်မှု ကျူးလွန်သူ ၁၀ ယောက်ကို ​သေဒဏ်ချမှတ်ခဲ့ဖူးပါတယ်။